ქართული ოცნების დეპუტატი და ადამიანის უფლებათა კომიტეტის თავმჯდომარე, მიხეილ სარჯველაძე პრემიერმინისტრის მიხეილ სააკაშვილთან დაკავშირებულ წერილს "სწორ ანალიზს" უწოდებს და აცხადებს, რომ ირაკლი ღარიბაშვილმა "ავს ავი დაარქვა" და ეს არავითარი დისკრედიტაცია არ არის.

"სწორი ანალიზია გაკეთებული იმისა, თუ რა შეიძლება ყოფილიყო ამ შემთხვევაში მოტივაცია ბატონი სააკაშვილის, როდესაც ახალ ავანტიურას სთავაზობდა ქართულ საზოგადოებას. როდესაც ავს არქმევენ ავს, ამაში არავითარი დისკრედიტაცია არ არსებობს. ამ შემთხვევაში საუბარია იმაზე, რომ ჭეშმარიტება გამოაშკარავდა", — აცხადებს სარჯველაძე.

6 ოქტომბერს პრემიერმინისტრმა ექსპრეზიდენტზე ვრცელი ფეისბუქპოსტი გამოაქვეყნა, რომელშიც ავითარებს სხვადასხვა აზრს, განიხილავს ჭორს და თეორიას იმაზე, თუ რატომ ჩამოვიდა ის ქვეყანაში. ვერსიებს შორის პრემიერს ნარკოტიკებზე დამოკიდებულება და სახელმწიფო გადატრიალებაც აქვს ისე, რომ ბრალდებების გასამყარებლად არა ფაქტები, არამედ მოსაზრებები მოჰყავს. ის დამამცირებელ კონტექსტში საუბრობს იმაზე, თითქოს "სააკაშვილის ფსიქოლოგიური და ფსიქიკური მდგომარეობა ციხეში შესვლამდე და შესვლის შემდეგ რადიკალურად შეიცვალა". უცნობია, რას ეყრდნობა ღარიბაშვილი, თუმცა ფსიქიკურ ჯანმრთელობაზე ირონიულად საუბარი აძლიერებს სტიგმას და დისკრიმინაციულია. პრემიერმინისტრის მსგავსად, ამ საკითხზე დამცინავ კომენტარებს აკეთებენ ქართული ოცნების სხვა ლიდერებიც.

ღარიბაშვილის ამ წერილს კრიტიკული გამოხმაურებები მოჰყვა ოპოზიციის მხრიდან. დროას ლიდერმა, ელენე ხოშტარიამ პრემიერმინისტრის ამ განცხადებას ფსკერი უწოდა და დაამატა, რომ ამ გზით ღარიბაშვილი ძალის დემონსტრირებას ცდილობს. ფოთის მერობის კანდიდატმა, გიგი უგულავამ პრემიერის წერილს კოტე ყუბანეიშვილის ლექსით უპასუხა და აღნიშნა, რომ მას შიში ალაპარაკებს. ერთიანი ნაციონალური მოძრაობის წევრმა და ქუთაისის მერობის კანდიდატმა, ხატია დეკანოიძემ განაცხადა, რომ "ასეთი სიმდაბლის პუტინის გამორჩეულ პროპაგანდისტებსაც შეშურდებოდათ". ლელოს ერთ-ერთი ლიდერი კახა კოჟორიძე ღარიბაშვილის მხრიდან პატიმრის ფსიქიკურ მდგომარეობაზე ცინიკურ საუბარს ამორალურ საქციელს უწოდებს. მიხეილ სააკაშვილის ადვოკატმა, ბექა ბასილაიამ კი აღნიშნა, რომ ექსპრეზიდენტი მხნედაა და ქართული საზოგადოება "ღარიბაშვილის ენაჭარტალა მონაჭორს" არ უნდა აჰყვეს. მან პრემიერს "ჩელენჯი" შესთავაზა — განუცხადა, რომ მზადაა, სააკაშვილმა ნარკოტესტი ჩააბაროს და თავადაც იმავენაირად უნდა მოიქცეს.

გაიგეთ მეტი: