ცოტა ხნის წინ საზოგადოება მუსიკოს გრაიმსისა და Tesla-სა და SpaceX-ის აღმასრულებელი დირექტორის, ილონ მასკის დაშორების ამბავმა აალაპარაკა. წყვილის დაშორების შესახებ ინფორმაციის გავრცელების შემდეგ საზოგადოების წინაშე პირველად გამოჩენისას გრაიმსი პაპარაცებმა კარლ მარქსის კომუნისტური პარტიის მანიფესტის კითხვაში გართული დააფიქსირეს.

გრაიმსმა მშვენივრად იცოდა, რომ პაპარაცის ობიექტში მოხვდებოდა და მსოფლიოს აალაპარაკებდა. ამის შესახებ მან სოციალურ ქსელებშიც დაწერა. გრაიმსმა საკუთარ ფოტოს თან ერთ-ერთი გამომცემლობის სტატიის ფოტოც დაურთო.

"ძალიან დამსტრესა იმან, რომ პაპარაცები ამ კვირაში მუდამ თან დამყვებოდნენ, მაგრამ შემდეგ მივხვდი, რომ ეს მათი დატროლვის შესაძლებლობა იყო...ჯერ კიდევ ილონ მასკთან ერთად ვცხოვრობ და არც კომუნისტი ვარ", — ამბობს გრაიმსი.

გრაიმსის თქმით, მართალია, მარქსის წიგნში ბევრი ჭკვიანური იდეაა, თუმცა თვითონ უფრო სხვა იდეოლოგიისკენ იხრება, რომელთა აღწერაც ურთულდება, რადგან პოლიტიკური სისტემები, რომელთაც მუსიკოსი მხარს უჭერს, ჯერ არ განხორციელებულა.

გრაიმსმა ფოტოს შესახებ 3 ოქტომბერს კიდევ ერთხელ დატვიტა:

"ეს ყველაფერი ძალიან სასაცილოა და ჩემი აგენტი ძალიან დასტრესილია, ამიტომ, ალბათ, იმპულსურად კონტროვერსიული ქმედებებისგან თავი უნდა შევიკავო. ჩემს მეგობარს წიგნი ჰქონდა, ფოტოგრაფები კი გარეთ იყვნენ. ამას მოგვიანებით, ალბათ, ძალიან ვინანებ", — წერს მუსიკოსი.

გავრცელებული ინფორმაციით, გრაიმსი და ილონ მასკი დაშორების შემდეგაც მეგობრულ ურთიერთობას ინარჩუნებენ. მათ საერთო შვილიც ჰყავთ. აღსანიშნავია, რომ გრაიმსის ფოტო მას შემდეგ გავრცელდა, რაც ილონ მასკმა ჯეფ ბეზოსსა და ბერნარდ არნოს გადაასწრო და მსოფლიოს უმდიდრესი ადამიანი გახდა.