"ქართული ოცნების" თავმჯდომარემ, ირაკლი კობახიძემ მუნიციპალიტეტის ორგანოთა დღევანდელი არჩევნების შესახებ ბრიფინგი გამართა. მისი თქმით, დილის 8 საათზე საარჩევნო უბნები კანონმდებლობის შესაბამისად გაიხსნა და საარჩევნო პროცედურები რაიმე არსებითი ხარვეზის გარეშე წარიმართა.

კობახიძემ მოსალოდნელ პროვოკაციებზე ისაუბრა და საარჩევნო პროცესში ჩართულ პირებს მოუწოდა, ნებისმიერ მსგავს შემთხვევას მაქსიმალური სიმშვიდითა და მოთმინებით შეხვდნენ. "ასევე, მოვუწოდებთ ნაციონალური მოძრაობის კუთვნილ ტელევიზიებს, მათ მიერ დამკვიდრებული ტრადიციის წინააღმდეგ, ნუ შეეცდებიან ხელოვნური აჟიოტაჟით შექმნან ყალბი აღქმები საარჩევნო გარემოსთან დაკავშირებით", — განაცხადა ქართული ოცნების თავმჯდომარემ.

მიხეილ სააკაშვილის საქართველოში ჩამოსვლისა და მისი დაკავების შესახებ დასმულ კითხვებზე საპასუხოდ კობახიძემ თქვა, რომ ოპერაცია დაიგეგმა ეფექტიანად და "ამის შედეგია ის, რომ მიხეილ სააკაშვილი დღეს არის იქ, სადაც არის მისი ადგილი".

"მიხეილ სააკაშვილი 9 წელი აკეთებდა რუსულ საქმეს, როცა იყო ხელისუფლებაში. მან ჩააბარა რუსეთის ფედერაციას ჩვენი ქვეყნის ტერიტორიების 20%", — განაცხადა კობახიძემ და დაურთო, რომ "დღესაც ის საქართველოში იყო ჩამოსული რუსული საქმის საკეთებლად".

ექსპრეზიდენტმა მიხეილ სააკაშვილმა დღეს ციხიდან წერილი გამოაქვეყნა, რომელშიც ამბობს, რომ მისი განაჩენი რუსეთის პრეზიდენტის, ვლადიმერ პუტინის დაკვეთით არის გამოტანილი.

ფოტო: ნიკა გვარამია / FB

სააკაშვილი აღნიშნავს, რომ მზად იყო დაკავებისთვის "მოგონილი და ყალბი განაჩენებით" და მსოფლიოს არცერთი ქვეყანა, რუსეთის გარდა ამას არ აღიარებს. მან კიდევ ერთხელ მოუწოდა ხალხს, რომ წავიდნენ არჩევნებზე და შემდეგ "ერთად დაიცვან რეფერენდუმის შედეგები".