საზოგადოებრივ მაუწყებლის ეთერში აპრილიდან კვირაში ერთხელ ახალი გადაცემა გავა. გადაცემის წამყვანი რეზო ჭიჭინაძე იქნება. ახალი გადაცემა ისევე, როგორც საზოგადოებრივ მაუწყებელზე არსებული 101 გადაცემა (მოამბის გარდა), მიმდინარე წლის 17 ივლისს შეჩერდება.

"ამ გადაცემის ეთერში გაშვება იყო გადაწყვეტილი, მანამ ჩვენ მოვიდოდით. აბსოლუტურად არაფერ კავშირში ჩვენი მენეჯმენტი ამ გადაცემასთან არ არის და იმის გამო, რომ ეს გადაწყვეტილება მიღებული იყო, ჯგუფი დაკომპლექტებული და ორი გადაცემა ჩაწერილი, რომ არ ყოფილიყო არამიზნობრივი ხარჯვა, ჩვენ სხვა არჩევანი არ გვქონდა," - ამბობს ანთაძე, რომლის თქმითაც, ახალი მენეჯმენტის მიერ შერჩეული გადაცემები ეთერში შემოდგომიდან გავა.

როგორც ია ანთაძე ამბობს, გადაცემა უახლოესი ისტორიის სხვადასხვა მომენტის შესახებ გაკეთებული ტოქშოუ იქნება. გადაცემის მონაწილეები დღევანდელი გადასახედიდან შეაფასებენ ძველ ამბებს, რაც ხდებოდა ბოლო 20-30 წლის განმავლობაში.

საზოგადოებრივი მაუწყებლის ვებგვერდზე არსებული ინფორმაციის მიხედვით, გადაცემის წამყვანი, რეზო ჭიჭინაძე სხვადასხვა დროს მუშაობდა პირველ არხზე, პროგრამა ალიონისა და პროგრამა მოამბის კორესპონდენტად, გადაცემების - პრეზიდენტი გისმენთ და მედია მოდის პროდიუსერად, დილის პროგრამის - ადრე წამყვანად. გარდა ამისა, ტელეკომპანია იბერიის საინფორმაციო გამოშვების - ახალი ამბების ჟურნალისტად და წამყვანად, ტელეკომპანია მზის ანალიტიკური დებატების წამყვანად. 2013 წლიდან დღემდე კი, არის საზოგადოებრივი მაუწყებლის დილის პროგრამის გენერალური პროდიუსერი.

ახალი გადაცემის დაწყების პარალელურად საზოგადოებრივ მაუწყებელზე რეფორმა გრძელდება. რეფორმის ფარგლებში 2017 წლის 17 ივლისიდან არხზე ყველა გადაცემა (მოამბის გარდა) ჩერდება, ახალი გადაცემები კი შემოდგომის სეზონისთვის კონკურსის წესით შეირჩევა.