29 სექტემბერს, ვატიკანში, წმინდა საყდართან საქართველოს საელჩოს ხელშეწყობით, ქართველი პოეტი დათო მაღრაძე რომის პაპ ფრანცისკეს შეხვდა. პოეტმა კათოლიკე ეკლესიის მეთაურს თავისი წიგნი, ბარაქიანი მიწა და დეკანოზ ალექსანდრე გალდავას შესრულებული ხატი გადასცა.

შეხვედრაზე საუბრის მთავარი თემა სწორედ მაღრაძის პოემის, ბარაქიანი მიწის ფრაზა იყო: "აჩრდილი დადის ევროპაში, პოეზიის აჩრდილი დადის — მოქალაქეში ადამიანის გადასარჩენად…".

აუდიენციას ესწრებოდა ვატიკანში საქართველოს საგანგებო და სრულუფლებიანი ელჩი, ქეთევან ბაგრატიონიც.

ფოტო: საქართველოს საელჩო წმინდა საყდართან

ბარაქიანი მიწის წარდგენა წინა წლის დეკემბერში, თბილისის სახელმწიფო უნივერსიტეტში, შედგა და მას ქართველი მწერლები და ლიტერატორებიც უძღვებოდნენ. თსუ-ის ცნობით, სემინარი, რომლის ფარგლებშიც პოემის პრეზენტაცია ჩატარდა, სიმბოლურად გაიმართა 93-ე აუდიტორიაში, რომელიც 1947 წლიდან მასპინძლობდა სტუდენტურ ლიტერატურულ ღონისძიებებს.

აღსანიშნავია, რომ მაღრაძის ეს პოემა თარგმნილია ინგლისურ, იტალიურ, შვედურ, ესპანურ და რუსულ ენებზე.

2020 წლის ოქტომბერში, ორტა-სანჯულიოს კუნძულზე, ინგლისური გამოცემის Poetry on the lake-ის და UNESCO-ის კომიტეტის ყოველწლიური დაჯილდოების ცერემონიაზე, პოემისთვის ბარაქიანი მიწა, დათო მაღრაძე მთავარი პრიზით, ვერცხლის დრაკონით, დაჯილდოვდა.