აშშ-ის ელჩი საქართველოში კელი დეგანანი ამბობს ამბობს, რომ მათ გამოთქვეს შეშფოთება იმ დაშინების, შევიწროების, მედიასა და სამოქალაქო საზოგადოებაზე თავდასხმების შესახებ, რომლებზეც ცნობები გავრცელდა. დეგნანის თქმით, ზოგადად და არც საარჩევნო პერიოდში მსგავსი ფაქტების ადგილი არ არის.

"ჩვენ გამოვთქვით შეშფოთება იმ ცნობებზე, რომლებიც ეხებოდა დაშინებას, შევიწრებას. ვთქვით და ახლაც ვიმეორებთ, არ არის საარჩევნო კამპანიის პერიოდში და ზოგადად, ამ ფაქტების ადგილი. ასევე, სიძულვილის ენა კიდევ ერთხელ ხელს უწყობს საზოგადოების ერთმანეთთან დაშორებას, რომელიც ისედაც პოლარიზებულია. ასევე, მიუღებელია თავდასხმები მედიის, სამოქალაქო საზოგადოების წინააღმდეგ. მედიამ უნდა შეძლოს საკუთარი საქმიანობის მშვიდ გარემოში განხორციელება, მოქალაქეების ინფორმირება", — განაცხადა აშშ-ის ელჩმა.

საქართველოში თვითმმართველობის არჩევნები 2 ოქტომბერს ჩატარდება. მას ოპოზიცია რეფერენდუმს უწოდებს და აცხადებს, რომ თუ ქართული ოცნება 43%-ს ვერ აიღებს, რიგგარეშე არჩევნები ჩატარდება. აღნიშნულს არ ეთანხმება მმართველი პარტია, რომელიც 28 ივლისს შეთანხმებიდან გავიდა და დოკუმენტი ანულირებულად გამოაცხადა. პარტიის თავმჯდომარემ, ირაკლი კობახიძემ ეს ოპოზიციას დააბრალა და თქვა, რომ შეთანხმებას მხოლოდ ისინი ასრულებდნენ, რაც არასწორია, ამიტომ დოკუმენტმა თავი ამოწურა.

მიშელის შეთანხმების ერთ-ერთი მთავარი ჩანაწერი კი სწორედ 43%-იანი ბარიერი იყო, რაც იმას ნიშნავდა, რომ თუ ქართულ ოცნებას თვითმმართველობის არჩევნებზე ამაზე ნაკლები შედეგი ექნებოდა, რიგგარეშე არჩევნები უნდა ჩატარებულიყო. ახლა ეს დათქმა აღარ არსებობს.