ნაციონალური მოძრაობის თავმჯდომარისა და თბილისის მერობის კანდიდატის, ნიკა მელიას განცხადებით ნაციონალური მოძრაობა პოლიტიკური ქედმაღლობით გამორჩეული პარტია იყო, თუმცა მისივე თქმით, მათ ამის მიზეზიც ჰქონდათ, რადგან წარმატებულები იყვნენ და სხვა პარტიებთან თანამშრომლობის აუცილებლობას ვერ ხედავდნენ.

"ჩვენ პარტნიორობისთვის მზად ვართ. ნაციონალური მოძრაობა, ვაღიარებ, იყო პოლიტიკური ქედმაღლობით გამორჩეული პარტია, რომელსაც არ გაემტყუნებოდა, რომ ასეთ მდგომარეობაში ხედავდით, იმიტომ რომ ბევრი წარმატებისთვის ჰქონდა მიღწეული თავის დროზე და აუცილებლობას თანამშრომლობისთვის სახელმწიფოს განვითარების იმ ეტაპზე ვერ ხედავდა სხვა პარტიებთან მიმართებაში", — განაცხადა მან ფორმულას ეთერში.

მელიას თქმით, ნაციონალურ მოძრაობას განახლებისა და საკუთარი შეცდომების სწორად გადააზრების შესაშური უნარი აღმოაჩნდა.

"მე ვფიქრობ, რომ თუ კი რამე განასხვავებს ამ ფორმაციის ნაციონალურ მოძრაობას იმ ფორმაციის ნაციონალური მოძრაობისგან არის სწორედ უნარი თანამშრომლობის. ნაციონალურ მოძრაობას შესაშური უნარი აღმოაჩნდა ერთი განახლებისა და მეორე, უბრალოდ, საკუთარი შეცდომების სწორად გაანალიზების და აქედან გამომდინარე, სწორი ნაბიჯების გადადგმის", — აცხადებს მელია ფორმულას ეთერში.

მისივე თქმით, ის, რომ დღეს ისინი შეთანხმებული კანდიდატებით არიან წარმოდგენილი და ენმ-მ საკუთარ თავში იპოვა ძალა, რომ დაეთმო სხვა ოპოზიციური პარტიებისთვის დედაქალაქში მაჟორიტარული ოლქები, ადრე შეუძლებელი იყო.