ექსპრემიერისა და თბილისის მერობის კანდიდატის, გიორგი გახარიას მტკიცებით, მან არჩევნებში მონაწილეობის გადაწყვეტილება იმის გამო მიიღო, რომ პარტიის პირველ კანდიდატზე ხელისუფლების მხრიდან ზეწოლა განხორციელდა.

"ჩვენ მართლა ღირსეული მერობის კანდიდატი გვყავდა, რომელიც, შემიძლია, ასევე, გულწრფელად გითხრათ, რომ ჩემზე ბევრად უკეთესი მერი იქნებოდა, თუმცა, სამწუხაროდ, მასზეც განხორციელდა ზეწოლა და ეს იყო უკვე ბოლო წითელი ხაზი, რის გამოც მე ეს გადაწყვეტილება მივიღე. ეს იყო აბსოლუტურად გააზრებული გადაწყვეტილება", — თქვა მან.

ექსპრემიერი გიორგი გახარიას თვითმმართველობის არჩევნებში მერობის კანდიდატად მონაწილეობის შესახებ ცნობილი პირველ სექტემბერს გახდა.

საქართველოში თვითმმართველობის არჩევნები 2 ოქტომბერს იქნება. მას ოპოზიცია რეფერენდუმს უწოდებს და აცხადებს, რომ თუ ქართული ოცნება 43%-ს ვერ აიღებს, რიგგარეშე არჩევნები ჩატარდება. აღნიშნულს არ ეთანხმება მმართველი პარტია, რომელიც 28 ივლისს შეთანხმებიდან გავიდა და დოკუმენტი ანულირებულად გამოაცხადა.