ბალენსიაგას საზოგადოების ყურადღება არასდროს აკლია, თუმცა ამჯერად ბრენდს რასიზმში ადანაშაულებენ. ამის მიზეზი $1 190-ის ღირებულების შარვალი გახდა. ახალ დიზაინში სპორტული შარვლიდან მამაკაცის განიერი ტრუსი მოჩანს. კრიტიკოსების თქმით, აღნიშნული სტილი შავკანიანთა კულტურის ნაწილია, რომელიც საზოგადოებაში ჰიპ-ჰოპის წარმომადგენლებმა დაამკვიდრეს.

ბალენსიაგას თქმით, ბრენდი სხვადასხვა ტანსაცმელს ერთ სამოსში ხშირად აერთიანებს და აღნიშნული მოდელიც სწორედ ბრენდის კონცეფციის გაგრძელებაა.

ტრენდი, რომელიც ჩაჩაჩული შარვლიდან ტრუსის ნაწილის გამოჩენას გულისხმობს, 90-იან წლებში სკეიტერებსა და ჰიპ-ჰოპერებში იყო პოპულარული. 2000-იან წლებში ზოგიერთ შტატში აღნიშნული სტილი აიკრძალა, რაც კრიტიკოსებმა დისკრიმინაციად შეაფასეს.

ტიკტოკის ერთ-ერთმა მომხმარებელმა, Mr200m-მა ვიდეო გამოაქვეყნა, რომელშიც მეგობართან ერთად ბალენსიაგას შარვალს ათვალიერებს. ისინი შარვალს რასისტულად აფასებენ. ვიდეოს 240 ათასზე მეტი მოწონება აქვს.

@mr200m__

You know when something feels racist 🥲😂 @sxbwxyy I have questions ##fypシ

♬ original sound - Mr200m

შარვალი ტვიტერზეც განიხილეს. მომხმარებლების ნაწილმა ბალენსიაგა ორმაგი სტანდარტების, კულტურის მითვისებისა და რასიზმისთვის გააკრიტიკა.

"ისეთ კანონებს უარსებია, რომლებმაც ჩაჩაჩული შარვლები არალეგალურად გამოაცხადა და ამ დროს დიზაინერები შემოსავალს იღებენ იმისთვის, რისთვისაც შავკანიანი ადამიანების კრიმინალიზება ხდება. ამაზრზენია", — წერს ერთ-ერთი მომხმარებელი ტვიტერზე.

საზოგადოების მეორე ნაწილი შარვალს რასისტულად არ აფასებს. მათი თქმით, მსგავსი სტილი 90-იან წლებში საკმაოდ გავრცელებული იყო.