თითქმის ორწლიანი პაუზის შემდეგ, გასულ უქმეებზე, ინგლისელი მომღერლის, ჰარი სტაილსის, პირველი კონცერტი ლას-ვეგასში ჩატარდა. კონცერტზე მომღერალმა 2019 წელს გამოშვებული ალბომის, Fine Line-ის, რჩეული სიმღერები შეასრულა მსმენელის წინაშე. თუმცა, სტაილსის გამოსვლას ხმაური მხოლოდ არენაზე არ მოჰყოლია.

სცენიდან მაყურებელს არა მხოლოდ საყვარელი ჰანგები, არამედ მომღერლის ნერწყვიც ერგო წილად. ბევრის აზრით, ეს ქმედება კოვიდპანდემიის პირობებში, პრობლემურია.

ჰარის გულშემატკივრებს ალბათ ეცოდინებათ, რომ კონცერტებზე მომღერლის ერთ-ერთი "საფირმო ჟესტი", რომელსაც "ვეშაპს" ეძახიან, პირში წყლის ჩაგუბება და მაღლა ამონთხევაა.

ინტერნეტში გამოქვეყნებულ ვიდეოებში ჩანს, რომ სტაილსმა "ვეშაპის" შესრულება ამჯერადაც სცადა და წყალი მაშინ ამოანთხია, როცა მსმენელები მასთან ახლოს იდგნენ.

თუმცა, როცა კონცერტის შემდეგ მომღერალმა ტვიტერს მიაშურა ფანებისთვის მადლობის გადასახდელად, იქ ისეთი ამბავი დახვდა, მადლობას აშკარად ბოდიში აჯობებდა.

ვიდეოს ნახვის შემდეგ, ათასობით ინტერნეტმომხმარებელმა მომღერალი საკუთარ ტვიტში მონიშნა და განაცხადა, რომ დახურულ სივრცეში თავმოყრილი აუდიტორიისთვის გადაპურჭყება უპასუხისმგებლო და საფრთხის შემცველი ქმედებაა, მაშინ, როცა მსოფლიო პანდემიას ებრძვის.

ფოტო: Anthony Pham / Getty Images

სტაილსის ტურნე Love On Tour, რომელიც ცოტა ხნის წინ დაიწყო, კოვიდრეგულაციების გათვალისწინებით უნდა ჩატარდეს: დასწრების მსურველებმა PCR ტესტის უარყოფითი შედეგი უნდა წარადგინონ და კონცერტზე ყოფნისას პირბადე უნდა ეკეთოთ. თუმცა, შაბათს გამართული კონცერტის ფოტოებზე ჩანს, რომ ბევრ მსმენელს პირბადე საერთოდ არ უკეთია.