პრემიერმინისტრ ირაკლი ღარიბაშვილის განცხადებით, ევროკავშირის დახმარებასთან დაკავშირებით პრეზიდენტს საკმარისი ინფორმაცია არ აქვს და მას "აუხსნიან". ასე უპასუხა მან ჟურნალისტის კითხვას პრეზიდენტის კრიტიკის შესახებ და პარალელს რიკოთის უღელტეხილის მშენებლობასთან, რომელიც ასევე სესხით კეთდება.

"მე ვფიქრობ, პრეზიდენტს არ აქვს საკმარისი ინფორმაცია და ჩვენ მას ავუხსნით, მივაწოდებთ ინფორმაციას იმის თაობაზე, თუ საერთოდ რა ვალზეა საუბარი, როგორ არის დიფერენცირებული ეს ვალები და საერთოდ როგორ მართავს მთავრობა ამ პროცესს. [...] ეს სესხი არაფრით უკავშირდებოდა არც რიკოთის გზების მშენებლობას. აქედან გამომდინარე, მე მინდა ვთქვა, რომ მაღალი ალბათობით, პრეზიდენტს არ ჰქონდა ინფორმაცია, მაგრამ მე დავავალებ ადმინისტრაციას, ინფორმაციას აუცილებლად მივაწოდებთ", — აცხადებს ღარიბაშვილი.

მისივე თქმით, პრეზიდენტს შესაძლოა განსხვავებული აზრი გააჩნდეს და ეს "მისი უფლებაა".

"ზედმეტი დრამატიზება და ჩვენი მოსახლეობის დაძაბვა არ არის საჭირო. პრეზიდენტს, რა თქმა უნდა, თავისი აზრი აქვს. მას შესაძლოა განსხვავებული აზრი გააჩნდეს, ეს მისი უფლებაა. ჩვენ ასე ვხედავთ, სააკაშვილი სხვანაირად ხედავს და თქვენ სხვანაირად ხედავთ", — უთხრა მან ჟურნალისტს.

პრემიერმინისტრის განცხადებით, "ძალიან გადაჭარბებული და გაზვიადებულია შეფასება იმის თაობაზე, რომ თითქოს მთავრობამ რაღაც ევროპულ, თან ხაზგასმით, ვალზე თქვა უარი". ის კვლავ ხაზს უსვამს, რომ ეს იყო სესხი და არა დახმარება და კვლავ აცხადებს, რომ მთავრობამ ეტაპობრივად საგარეო ვალის შემცირება გადაწყვიტა და იმ სესხებზე თქვა უარი, რომელთა აღებაც "არ შექმნის რაიმე პრობლემას". ამასთან, მან გაიმეორა ისიც, რომ "ამ კონკრეტულმა სესხმა შეიძინა პოლიტიკური დატვირთვა" და ამით ოპონენტები "სპეკულირებდნენ". მხოლოდ მესამე მიზეზად დაასახელა პრემიერმინისტრმა ის, რომ ფინანსები სასამართლო რეფორმასთან იყო დაკავშირებული და აღნიშნა:

"როცა ასეთი წვრილმანებით ვკონცენტრირდებით და ურთიერთობას ხაზს ვუსვამთ ევროკავშირთან, მე ვფიქრობ, რომ ეს დამაკნინებელი და დამაზიანებელია საქართველო-ევროკავშირის ურთიერთობების. ჩვენ გაცილებით უფრო მაღალი დონის სტრატეგიული ურთიერთობა და თანამშრომლობა გვაკავშირებს ევროკავშირთან, ვიდრე ეს ერთი კონკრეტული, ცალკე აღებული სესხის ნაწილი. 75 მილიონი ევრო რაიმე კრიტიკულ მნიშვნელობას არ იძენს. ეს არ ნიშნავს იმას, რომ მთავრობა აჩერებს თუ გადახედავს ურთიერთობას ევროკავშირთან ამ მიმართულებით".

გუშინ, ორ სექტემბერს პრეზიდენტმა სალომე ზურაბიშვილმა განაცხადა, რომ "ცოტა არ იყოს, პარადოქსულად ჟღერს ერთი ხელით ევროპის სესხზე აურის თქმა და მეორეს მხრივ, სხვადასხვა პროექტებზე, მათ შორის რიკოთის მაგისტრალის მშენებლობაზე აპელირება, მაშინ, როცა იგი დიდწილად ევროპიდან წამოსული სესხებით ხორციელდება".

საქართველომ ევროკავშირის მაკროფინანსური დახმარების მეორე ნაწილზე უარი თქვა. ამას წინ უძღოდა მმართველი პარტიის მიერ შარლ მიშელის დოკუმენტის ანულირებულად გამოცხადება, რაც 43%-იანი ბარიერის ვერგადალახვის შემთხვევაში რიგგარეშე არჩევნების ჩანიშვნაზე უარის თქმასაც გულისხმობს. ამასთან, დოკუმენტის მოთხოვნაა მართლმსაჯულების რეფორმა მხარეების ჩართულობით, მანამდე კი უზნაეს სასამართლოში მოსამართლეების დანიშვნისგან თავის შეკავება. ქართულმა ოცნებამ ეს პირობა არ შეასრულა, რის გამოც პარტნიორებისგან არაერთი კრიტიკა მიიღო. მეტიც, ამერიკის შეერთებული შტატების საელჩომ Twitter-ზე გამოაქვეყნა დოკუმენტის ფოტო, სადაც ეს მოთხოვნები ყვითლად იყო მონიშნული. ამის შემდეგ პრემიერმინისტრი ირაკლი ღარიბაშვილი უკრაინაში ევროპული საბჭოს პრეზიდენტს, შარლ მიშელს შეხვდა, რომელმაც შეხვედრის შემდეგ განაცხადა, რომ რეფორმები ახლა ისეა საჭირო, როგორც არასდროს. მისივე თქმით, "მოსალოდნელი მაკროსაფინანსო დახმარების გაცემის ვადა ახლოვდება და დროა, საქართველოს მთავრობამ აჩვენოს, რომ ერთგულია შეთანხმების, განსაკუთრებით რეფორმების ნაწილში".

ამის შემდეგ ქართული ოცნება ამ დახმარების მიღების მიზანშეუწონლობაზე ალაპარაკდა. მათი მტკიცებით, მთავრობამ დაიწყო საგარეო ვალის შემცირება და ამ თანხის მიღების აუცილებლობა, სავარაუდოდ, აღარ იქნება. ირაკლი კობახიძემაც თქვა, რომ ამ დახმარებას "ფინანსური დატვირთვა აღარ აქვს". დახმარების არგამოყოფის შემთხვევაში პოლიტიკურ დატვირთვასთან დაკავშირებით კი კობახიძე აცხადებს, რომ ქართულ ოცნებას ეს გაცნობიერებული აქვს და ყველაფერი ევროკავშირის გადასაწყვეტია, "მაგრამ ქართული ოცნება თავიდან ბოლომდე მოქმედებს ქვეყნის და ჩვენი სტრატეგიული პარტნიორების ობიექტური ინტერესების შესაბამისად".

აღსანიშნავია, რომ ამ თანხასთან დაკავშირებით საქართველოს პარლამენტსა და ევროკავშირს შორის გაფორმებულ ურთიერთგაგების მემორანდუმს ჰქვია "მაკროფინანსური დახმარება საქართველოსთვის 150 მილიონ ევრომდე", ხოლო ევროკავშირი მოხსენიებულია, როგორც სესხის გამცემი. ეს არის დაბალპროცენტიანი სესხი, რომელსაც ფინანსურთან ერთად, დიდწილად პოლიტიკური დანიშნულებაც აქვს, რადგან დახმარების მეორე ნაწილის მიღება დოკუმენტში გაწერილი ვალდებულებების შესრულებაზე იყო დამოკიდებული.

ოპოზიცია და ექსპერტების ნაწილი მიიჩნევს, რომ რეალურად ქართულმა ოცნებამ იცოდა, რომ ევროკავშირს პირობების შეუსრულებლობის გამო დახმარებაზე უარის თქმა ჰქონდა გადაწყვეტილი და თავად დაასწრო უარი. ევროკავშირის წარმომადგენლობის განცხადებით, პატივს სცემენ ხელისუფლების გადაწყვეტილებას, არ მიიღოს მაკროფინანსური დახმარება, თუმცა საქართველომ მისი მიღების პირობები ვერ შეასრულა. მათი თქმით, საქართველოსთვის გასაცემი დახმარება დამოკიდებული იქნება ძირითადი რეფორმების განხორციელებისას მიღწეულ წინსვლაზე.

გაიგეთ მეტი: