წიგნი, შინაარსთან ერთად, პოლიგრაფიული მახასიათებლებითაც ფასობს. ერთ-ერთი ასეთი მახასიათებელია გამოცემის მოოქროვილი ყდა. ამ საქმეში დახელოვნება კი წიგნის რესტავრაციაში ცალკე მიმართულებაა. სწორედ ამ ხელოვნების დასაუფლებლად და სხვა საინტერესო სიახლეების გასაცნობად იმყოფებიან ეროვნული ბიბლიოთეკის წარმომადგენლები, ფონდების კონსერვაციისა და რესტავრაციის განყოფილების უფროსი გიული პაქსაშვილი და ამავე განყოფილების თანამშრომელი ნინო ჩიმაკაძე კიევში. ისინი უკრაინის სამეცნიერო-კვლევით სარესტავრაციო ცენტრში გადიან სტაჟირებას, სადაც სიახლეების გაცნობასთან ერთად, კოლეგებს საკუთარ გამოცდილებასაც უზიარებენ.

ფოტო: ეროვნული ბიბლიოთეკა

ფოტო: ეროვნული ბიბლიოთეკა

"ჩვენ გვსურს ქიმიური ლაბორატორიის მოწყობა, სადაც დავადგენთ, თუ რა დაავადება აქვს ფურცელს, რა ხარისხისაა ეს დაავადება, როგორია ფურცლის მჟავიანობა და როგორ უნდა მოხდეს მისი განმჟავება. ეს მიმართულება, ისევე როგორც ტყავის მოოქროვება, სრულიად ახალია ჩვენთვის და აქ მიღებული ცოდნა ძალიან დაგვეხმარება სამომავლო საქმიანობაში. სიახლეებს ვეცნობით ფოტოს რესტავრაციის მიმართულებითაც. ამ მიმართულების დანერგვასაც ვგეგმავთ განყოფილებაში, რადგან ეროვნული ბიბლიოთეკის ფოტოარქივში უკვე ათასობით ფოტო ინახება და მათი საუკეთესო მდგომარეობაში შენახვა ჩვენთვის ძალიან მნიშვნელოვანია", — ამბობს გიული პაქსაშვილი.