ქართული ოცნების თავმჯდომარის, ირაკლი კობახიძის განცხადებით, წინა ხელისუფლების კრიტიკა მათი ვალდებულებაა. პალიტრანიუსის ეთერში ჟურნალისტმა მას ჰკითხა კამპანიის დროს მეტწილად ენმ-ზე საუბრის შესახებ, საპასუხოდ კი კობახიძემ მაგალითად 1945 წლამდე გერმანია მოიყვანა, პერიოდი, როცა ქვეყანას ჰიტლერი მართავდა და თქვა, რომ გერმანიაში მოსწავლეებს ამას დღემდე ახსენებენ.

"მეორე ადგილზე გადიან და იმიტომ. ჩვენ წინახელისუფლებაზე კი არ ვლაპარაკობთ მარტო...შეხსენება ყოველთვის არის საჭირო, გერმანელ ბავშვებს დღემდე ახსენებენ იმას, თუ რა ხდებოდა 1945 წლამდე, ახსენებენ სკოლებში. 9 წლის წინ რა ხდებოდა, ამის შეხსენება, მოსახლეობისთვის, ბუნებრივია, ჩვენი ვალდებულებაა. თქვენ გახსოვთ, რომ ძალიან მძიმე რაღაცები ხდებოდა, ისეთი რაღაცები, რაც საქართველოში აღარასდროს უნდა განმეორდეს. აქედან გამომდინარე არის ჩვენი პასუხისმგებლობა, რომ ეს ყველაფერი კიდევ ერთხელ შევახსენოთ საზოგადოებას", — აცხადებს კობახიძე.

მმართველი პარტიის ლიდერი ამტკიცებს, რომ მათი კამპანიის 90% ეთმობა საუბარს იმაზე, თუ რა გააკეთა ქართულმა ოცნებამ და რის გაკეთებას აპირებს, ხოლო ოპონენტებს — მხოლოდ 10%.

"ეს არის, ბუნებრივია, აბსოლუტურად ნორმალური ნებისმიერ პოლიტიკურ კამპანიაში", — დასძენს ის.

ცნობისთვის, ქართული ოცნება ბოლო პერიოდში რეგიონებში კანდიდატებს წარადგენს, სიტყვით გამოსვლისას კი პარტიის ლიდერების საუბარი მეტწილად ოპონენტს, ნაციონალურ მოძრაობას ეხება.