პრეზიდენტ სალომე ზურაბიშვილის თქმით, მიზნებსა და პრინციპებს საზოგადოების თითოეული წევრი პირნათლად უნდა ემსახუროს. ასე ეხმაურება ის საქართველოს მოქმედი კონსტიტუციის მიღების 26 წლის იუბილეს.

"1995 წლის 24 აგვისტოს საქართველოს პარლამენტმა მიიღო ქვეყნის ძირითადი კანონი — საქართველოს კონსტიტუცია, რომელიც ეყრდნობოდა საქართველოს 1921 წლის კონსტიტუციის ისტორიულ-სამართლებრივ მემკვიდრეობასა და ქართველი ერის მრავალსაუკუნოვანი სახელმწიფოებრიობის ტრადიციებს.

კონსტიტუცია, როგორც ეროვნული თანხმობის, ერთიანობისა და განვითარების დოკუმენტი, არა მხოლოდ ქვეყნის უზენაესი კანონი, ან უბრალოდ ნორმათა ერთობლიობაა, არამედ ის ჩვენი ქვეყნის მოქალაქეების გამაერთიანებელი დოკუმენტია", — აცხადებს სალომე ზურაბიშვილი.

პრეზიდენტმა ყურადღება გაამახვილა იმაზეც, რომ წელს აღინიშნება ქვეყნის პირველი კონსტიტუციის მიღების 100 წლის იუბილეც და აღნიშნა, რომ იგი ერთ-ერთ პროგრესულ კონსტიტუციადაა აღიარებული.