თბილისის ყოფილ მერს, გიგი უგულავას ფოთის მერობა სურს. ის ნაციონალურმა მოძრაობამ ფოთის მერობის კანდიდატად ოფიციალურად წარადგინა. უგულავამ სიტყვით გამოსვლისას განაცხადა, რომ უარი უნდა ვთქვათ ისეთ მერებზე, რომლებსაც საკუთარი ჩრდილისაც ეშინიათ.

"ისეთ მერებზე, რომლებიც მარტო აპირებენ ემსახურონ ოლიგარქს. დააკვირდით, რა ხდება მთელს ქვეყანაში და განსაკუთრებით, აქ, ფოთში. რატომ არის ოლიგარქია დამღუპველი, რატომ აღარიბებს ოლიგარქია? ხშირად არის, რომ რა მნიშვნელობა აქვს ჩემთვის, ივანიშვილი იქნება, პეტრე თუ პავლე. არა, მეგობრებო, ოლიგარქია ნიშნავს იმას, რომ ქვეყანაში ფული აქვს ძალიან ცოტას და უმეტესი, 90% ჩვენი მოქალაქეების არიან მეორე ხარისხოვანი მოქალაქეები", — განაცხადა მან.

19 აგვისტოს ცნობილი გახდა, რომ ფოთში ოპოზიციის კანდიდატი გიგი უგულავა იქნებოდა. აქამდე ვრცელდებოდა ინფორმაცია, რომ კანდიდატებად თინა ბოკუჩავა და ბექა ბასილაია განიხილებოდნენ. გიგი უგულავა თვითმმართველობის არჩევნებზე ნაციონალური მოძრაობის სახელით წარსდგება, მიუხედავად იმისა, რომ პარტიის წევრი არ არის.

საქართველოში თვითმმართველობის არჩევნები 2 ოქტომბერს გაიმართება. თითქმის მთელი საქართველოს მასშტაბით ოპოზიციის დიდმა ნაწილმა კანდიდატებთან დაკავშირებით შეთანხმებას მიაღწია. ჯერჯერობით უცნობია ლელოს პოზიცია, ხოლო სტრატეგია აღმაშენებელი და ლეიბორისტული პარტია კანდიდატებს დამოუკიდებლად აყენებენ. არჩევნებში ჩართულია ექსპრემიერ გიორგი გახარიას პარტიაც, თუმცა ის ოპოზიციასთან არ თანამშრომლობს.