თურქეთში 28 ივლისს გაჩენილი ძლიერი ხანძრის ჩაქრობას 8 აგვისტოს მოსულმა წვიმამ შეუწყო ხელი. ამ დროისათვის ხანძრის 223 კერიდან ჩასაქრობი ექვსი კერა რჩება.

ხანძარმა თურქეთის 47 პროვინცია მოიცვა, გარდაიცვალა 8 ადამიანი, დამწვარია საცხოვრებელი სახლები, რამდენიმე რეგიონში მოსახლეობის ევაკუაციაც გახდა საჭირო, განადგურებულია მნიშვნელოვანი ტურისტული ზონები.

თურქეთის პრეზიდენტი, რეჯეფ თაიფ ერდოღანი, ტვიტერზე ავრცელებს ინფორმაციას, რომ ბოლო მონაცემებით, ხანძრის ჩაქრობაში 5 000-ზე მეტი მეხანძრე-მაშველი, 18 თვითმფრინავი და 57 ვერტმფრენი იყო ჩართული.

თურქეთის დასახმარებლად ევროკავშირმა სამი სახანძრო-სამაშველო თვითმფრინავი გაგზავნა. რუსეთმა, უკრაინამ, აზერბაიჯანმა და ირანმა, ასევე, თურქეთში წყლის ბომბდამშენები გააგზავნეს. მეზობელ ქვეყანას დახმარება საქართველომაც შესთავაზა.

თურქეთის ხელისუფლებამ პირობა დადო, რომ დაზიანებულ სახლებს აღადგენენ და ხანძრის შედეგად დაზარალებულ რაიონებში ზარალს აანაზღაურებენ.