ეროვნული ბანკის ინფორმაციით, მთავრობამ კომერციული ბანკებისგან 35 მილიონი ლარი ისესხა.

"2021 წლის 22 ივნისის, ფინანსთა სამინისტროს სახაზინო ობლიგაციების აუქციონზე 35 000 000 ლარის ნომინალური ღირებულების 5-წლიანი ვადიანობის ფასიანი ქაღალდები გაიყიდა.

აუქციონში მონაწილეობა მიიღო ხუთმა კომერციულმა ბანკმა. მოთხოვნამ შეადგინა 83 750 000 ლარი. მინიმალური საპროცენტო განაკვეთი 9,05%-ით, მაქსიმალური 9,19%-ით, ხოლო საშუალო შეწონილი 9,085%-ით განისაზღვრა", — ნათქვამია სებ-ის განცხადებაში.

როგორც ცნობილია, კუპონური საპროცენტო განაკვეთი 8,125%-ს შეადგენდა — ეს ძირი თანხის ის ნაწილია, რომელიც მთავრობამ ფასიანი ქაღალდების მყიდველებს უნდა გადაუხადოს. კუპონის გადახდა წელიწადში ორჯერ, ყოველ ექვს თვეში მოხდება.

ფინანსთა სამინისტროს ინფორმაციით, მიმდინარე წლის 31 მაისის მდგომარეობით, საქართველოს სახელმწიფო ვალი 32,16 მილიარდი ლარი იყო, საიდანაც 26,35 მილიარდი საგარეო ვალდებულება, ხოლო 5,81 მილიარდი ლარი შიდა ვალია.