სახალხო დამცველის, ნინო ლომჯარიას განცხადებით, სახელმწიფო ინსპექტორის სამსახურს ინსტიტუციური პრობლემები აქვს, რაც გამოიხატება იმაში, რომ კანონმდებლობით ისინი პროკურატურისგან საკმარისად დისტანცირებულნი არ არიან. ომბუდსმენის თქმით, ეს კი მათ დამოუკიდებლობას ხელს უშლის.

"ზოგადად, ნამდვილად პოზიტიურად ვაფასებთ ჩვენს ურთიერთობას სახელმწიფო ინსპექტორის სამსახურთან. ისინი ჩვენთან მიმართებით არიან გახსნილები. არ გვქონია პრობლემა გამოძიების მასალებზე წვდომის და ამ მიმართულებით გათი გახსნილობა ნამდვილად აღსანიშნავია.

თუმცა მათივე ანგარიშებიდან ჩანს, რომ მართლდება ის შიშები, რაც სახალხო დამცველს ჰქონდა იმასთან დაკავშირებით, რომ კანონმდებლობამ სახელმწიფო ინსპექტორის სამსახურს საკმარისი დამოუკიდებლობის გარანტიები არ მიანიჭა. ანუ, მათ აქვთ ინსტიტუციური პრობლემები, რაც გამოიხატება იმაში, რომ კანონმდებლობით ისინი არ არიან საკმარისად დისტანცირებული პროკურატურისგან და დღეს მაგალითად, დევნის დაწყება პროკურატურის გადაწყვეტილებაზე არის დამოკიდებული. ის რომ ცალკეული საგამოძიებო მოქმედებების ჩატარებასთან დაკავშირებით, ასევე, პროკურატურის ნებართვაა საჭირო და ა.შ. მათივე ანგარიშები ცხადყოფს, რომ ეს ინსტიტუციური ბმა, რაც დარჩა პროკურატურასთან მათ დამოუკიდებლობას უშლის ხელს და ქმნის პრობლემებს", — განაცხადა ნინო ლომჯარიამ პარლამენტში ყოველწლიური ანგარიშის წარდგენისას.

სახალხო დამცველმა, ნინო ლომჯარიამ პარლამენტში 18 ივნისს 2020 წლის ადამიანის უფლებებისა და თავისუფლებების შესახებ წლიური ანგარიში წარადგინა. მოხსენების პრეზენტაციის შემდეგ ომბუდსმენს დეპუტატებმა კითხვები დაუსვეს.

საქართველოში ადამიანის უფლებათა და თავისუფლებათა დაცვის მდგომარეობის შესახებ სახალხო დამცველის 2020 წლის ანგარიშს სრულად შეგიძლიათ გაეცნოთ ამ ბმულზე.