ფრაქცია ლელო არასმთავრობო ორგანიზაციების მიერ შემუშავებულ ანტიკორუფციულ სააგენტოს შექმნასთან დაკავშირებით კანონპროექტს დაარეგისტრირებს. კანონპროექტი ხვალ, 3 ივნისს დარეგისტრირდება, 7 ივნისს კი ბიუროზე გავა.

"დღეს ყველაზე დიდი გამოწვევა ჩვენს ქვეყანას აქვს ნეპოტიზმი და კორუფცია. ეს არის ორი მცნება, რომელიც გადაჯაჭვულია ერთმანეთზე და სქემა შემდეგნაირად მუშაობს. ჯერ იწყება ნეპოტიზმით და შემდეგ გადადის უფრო ფართო და დამანგრეველ სენში, რასაც კორუფცია ჰქვია. ეს არის ერთ-ერთი ყველაზე დიდი შემაფერხებელი ფაქტორი ქვეყნის ეკონომიკური განვითარების, ინვესტიციების მოზიდვის და საერთოდ იმედის გაჩენის ამ ქვეყანაში. ამიტომ, ჩვენ ჩვენს პარტნიორებთან, კოლეგა დეპუტატებთან ერთად გადავწყვიტეთ ინიცირება გავუკეთოთ იმ კანონპროექტს, რომელზეც საკმაოდ სერიოზული მუშაობა ჩაატარა არასამთავრობო სექტორმა. კერძოდ, საერთაშორისო გამჭვირვალობა-საქართველომ და სხვა NGO-ებმა", — განაცხადა მამუკა ხაზარაძემ.

საერთაშორისო გამჭვირვალობა-საქართველოს თანაავტორობითა და სხვა არასამთავრობო ორგანიზაციების მიერ მომზადებული საკანონმდებლო პაკეტის განხილვა პარლამენტში დღეს შედგა.