მოსამართლეთა კონფერენციაზე იუსტიციის უმაღლესი საბჭოს 4 წევრი აირჩიეს. კერძოდ, ლევან მიქაბერიძე, თემურ გოგოხია, ბადრი შონია და გელა აბუსერიძე.

საბჭოს წევრები აქციის ფონზე აირჩიეს. შედეგების გამოცხადების შემდეგ კი, შენობაში მყოფი აქტივისტი სკანდირებდა "სირცხვილი", რის შემდეგაც ის დაცვამ გაიყვანა.

მცირე ინფორმაცია ახალი წევრების შესახებ:

ლევან მიქაბერიძე უზენაესი სასამართლოს მოსამართლეა. უვადო მოსამართლედ ის 2019 წლის დეკემბერში აირჩიეს. პარლამენტში გასაუბრებისას მიქაბერიძემ განაცხადა, რომ სასამართლო სისტემაში ე.წ. კლანური მმართველობის აღქმა არ აქვს.

გარდა ამისა, გასაუბრების მომენტისთვის მიქაბერიძე 37 წლის იყო, თუმცა მიაჩნდა, რომ აღნიშნულ თანამდებობაზე 40 წლიდან უნდა ინიშნებოდნენ.

თემურ გოგოხია თბილისის საქალაქო სასამართლოს უვადო მოსამართლეა. 2019 წელს, როცა იუსტიციის უმაღლესი საბჭოში მოსამართლეებთან გასაუბრება მიმდინარეობდა, არამოსამართლე წევრი, ნაზი ჯანეზაშილი ამბობდა, რომ თემურ გოგოხია საბჭოს ერთ-ერთი წევრის, რევაზ ნადარაიას ქვისლია. ჯანეზაშვილი აღნიშნავდა, რომ ნადირაიამ მისი აცილების საკითხი არ დააყენა.

გარდა ამისა, გოგოხიამ 2019 წელს 20 ივნისის საქმეზე ნიკა მელიას აღკვეთის ღონისძიების საკითხი განიხილა.

ბადრი შონია თბილისის საქალაქო სასამართლოს მოსამართლეა. შონია ბირჟა მაფიის საქმის მოსამართლე იყო. ამასთან, 2018 წელს კლუბ ბასიანის თანამშრომლის დაჭრაში ბრალდებულ თამაზ ქვლივიძეს გირაო შეუფარდა.

გოჩა აბუსერიძე 2020 წლიდან თბილისის სააპელაციო სასამართლოს მოსამართლეა. 2020 წელს აბუსერიძე უზენაესი სასამართლოს მოსამართლეობის კანდიდატი იყო. გასაუბრებაზე ქართველი ქალის დახასიათებისას მან თქვა, რომ დედობა და შვილების გაჩენა ერთ-ერთი მთავარი კომპონენტია.

მოსამართლეთა რიგგარეშე კონფერენციის პარალელურად, იუსტიციის უმაღლეს სკოლასთან აქცია მიმდინარეობდა. აქტივისტები საბჭოს წევრების არჩევას აპრიტესტებენ და პროცესის შეჩერებას ითხოვენ.

შეგახსენებთ, რომ ევროკავშირის ელჩმა, კარლ ჰარცელმა, აშშ-ის ელჩმა, კელი დეგნანმა და ევროპის საბჭოს ოფისის ხელმძღვანელმა, ნატალია ვუტოვამ პარლამენტის თავმჯდომარეს წერილი მისწერეს და შარლ მიშელის შეთანხმებით აღებული პასუხისმგებლობები და ვალდებულებები შეახსენეს. კერძოდ, დიპლომატები აღნიშნავენ, რომ უზენაეს სასამართლოში მოსამართლეების და იუსტიციის უმაღლესი საბჭოს წევრების დანიშვნის პროცესი დაუყოვნებლივ უნდა შეჩერდეს. მათი განცხადებით, ეს აჩვენებს ნამდვილ ერთგულებას მართლმსაჯულების გამჭვირვალობასა და მის მიმართ ნდობის გაზრდის საქმეში.

წერილს წერილითვე უპასუხა კახა კუჭავამ. პარლამენტის თავმჯდომარის განცხადებით, კონსტიტუციისა და შესაბამისი კანონმდებლობის თანახმად, პარლამენტს იუსტიციის უმაღლესი საბჭოს არამოსამართლე წევრების დამტკიცება მიმდინარე წლის ივნისში ევალება. სპიკერი აღნიშნავს, რომ საქართველოს პარლამენტი არ არის უფლებამოსილი, დაელოდოს 2022 წლის საგაზაფხულო სესიაზე განსახორციელებელ საკანონმდებლო ცვლილებებს და საბჭოში ხუთი ვაკანსია მომდევნო ერთი წლის განმავლობაში შეუვსებელი დატოვოს.

შარლ მიშელის დოკუმენტის ერთ-ერთი მთავარი პუნქტი სასამართლო რეფორმას ეხება. შეთანხმებაში წერია, რომ არსებული წესით უზენაეს სასამართლოში მოსამართლეების დანიშვნისგან თავი უნდა შეიკავონ. ამასთან, მითითებულია, რომ პარლამენტს უნდა წარედგინოს უზენაეს სასამართლოში დანიშვნის კანონპროექტი, სადაც გათვალისწინებული იქნება 2019 წელს გამოქვეყნებული ვენეციის კომისიის დასკვნა, ღია კენჭისყრა იუსტიციის უმაღლეს საბჭოში და ამ უკანასკნელის ნომინაციების დასაბუთების აუცილებლობა.

ასევე, უნდა მოხდეს იუსტიციის უმაღლესი საბჭოს არსებითი რეფორმა გამჭვირვალობის, მთლიანობის და სანდოობის მიზნით, მათ შორის დანიშვნებში, შეფასებებში, დაწინაურებებში, ტრანსფერებში, შედგენილია ზომები და საჩივრები, რომლებიც წარედგინება ვენეციის კომისიას და ეუთო/დემოკრატიული ინსტიტუტებისა და ადამიანის უფლებათა ოფისს (ODIHR) მოსაზრებისთვის და რეკომენდაციებისთვის, რაც სრულად უნდა შესრულდეს.