პარტია მოქალაქეების ლიდერის, ალეკო ელისაშვილის თქმით, გიგა ბოკერიას დამლაგებელი აღარ დარჩა პარტიაში.

"მთავარი არის ერთი, რომ ჩვენს მიერ შექმნილ დღის წესრიგზე, ანუ ხალხის პრობლემებზე დაიწყო უკვე ზოგიერთმა პოლიტიკურმა ძალამ ლაპარაკი. შენ ასეთი ხარ, შენ ისეთი ხარ დავამთავროთ და დავიწყოთ კონკრეტულ პრობლემებზე საუბარი, სანამ მართლა კაცი პოლიტიკოსებიღა დავრჩებით, თუ ასე გაგრძელდა, ამ ქვეყანაში, თუ მარტო ერთმანეთის ლანძღვაზე ვიყავით. დავსხდებით და ერთმანეთს ვურჩიოთ მაშინ საქმეები, გამოგკვეტონ სადღაც და ვურჩიოთ საქმეები, მაგრამ ეს მარტო ერთმანეთისთვის საქმეების გარჩევა, ერთმანეთთან ეს იწილობიწილო რომ უკუშედეგის მომტანია და ბუმერანგია, რომელიც განგრევს, აგერ, თუ ვინმეს აინტერესებს, შეხედეთ ბოკერიამ თავის თავს რა დამართა და ნაციონალურმა მოძრაობამ რა დამართა თავის თავს. ბოკერიას დამლაგებელი აღარ დარჩა პარტიაში", — თქვა ელისაშვილმა პალიტრანიუსის ეთერში.

2020 წლის არჩევნების შედეგად, ევროპულმა საქართველომ სულ 5 მანდატი მიიღო. მართალია, პარტია ოფიციალურად პარლამენტში არ შედის, მაგრამ იმ ადამიანებმა, რომლებიც არჩევნებზე ევროპულ საქართველოს წარმოადგენდნენ, საპარლამენტო საქმიანობაში ჩართვა გადაწყვიტეს. კერძოდ, დავით ბაქრაძემ, შალვა შავგულიძემ, არმაზ ახვლედიანმა და ტარიელ ნაკაიძემ. კიდევ ერთი მანდატი კი ელენე ხოშტარიას ეკუთვნის, რომელიც პარლამენტში შესვლას არ აპირებს, თუმცა უკვე დატოვა ევროპული საქართველო და ახალი პოლიტიკური მოძრაობა შექმნა.

ოპოზიციური პარტიების დიდი ნაწილი პარლამენტში შევიდა. განსხვავებული პოზიცია აქვს ლეიბორისტულ პარტიას, ასევე, ამ დროისთვის უცნობია ნაციონალური მოძრაობის საბოლოო გადაწყვეტილება.