საგარეო საქმეთა მინისტრის, დავით ზალკალიანის განცხადებით, ისრაელში განვითარებული მოვლენების დროს საქართველოს მოქალაქე მსუბუქად დაშავდა. რა სახის დაზიანებაზეა საუბარი, მინისტრი არ აზუსტებს.

"მან მიიღო ძალიან მცირე დაზიანება, მაგრამ მინდა დავამშვიდო ყველა, მათ შორის მისი ოჯახის წევრები, საელჩო არის მასთან კომუნიკაციაში, არანაირი გართულება არ არის და მის ჯანმრთელობას საფრთხე არ ემუქრება, იგი უკვე გამოწერილია საავადმყოფოდან და უსაფრთხოდ გრძნობს თავს", — განაცხადა დავით ზალკალიანმა.

საგარეო საქმეთა მინისტრი გმობს იმ სარაკეტო თავდასხმებს, რომელიც ისრაელში მშვიდობიანი მოსახლეობის წინააღმდეგ განხორციელდა. როგორც ზალკალიანი ამბობს, საელჩო 24-საათიან რეჟიმში მუშაობს.

10 მაისს იერუსალიმში დაპირისპირება გამწვავდა. რამდენიმე წლის შემდეგ პირველად, ჰამასმა იერუსალიმზე სარაკეტო თავდასხმა განახორციელა. საპასუხოდ, ისრაელმა ღაზას სექტორზე საჰაერო იერიში მიიტანა. 11 მაისს ღაზას სექტორმა დაბომბა თელ-ავივიც. სიტუაცია დაიძაბა ქალაქ ლოდშიც. მედიების ცნობით, გვიან ღამით დაიწვა სინაგოგები, მაღაზიები და ათეულობით მანქანა. მთავრობამ საგანგებო მდგომარეობა გამოაცხადა და სიტუაციის განსამუხტად ქალაქში სასაზღვრო პოლიცია გაიგზავნა.

ბოლო მონაცემებით, ღაზას სექტორში დაღუპულთა რიცხვი 35 პალესტინელი გარდაიცვალა, მათ შორის, 12 ბავშვი, დაშავდა — 233. ისრაელში სულ დაღუპულია 5 ადამიანი, რომელთაგან 3 ქალი და 2 ბავშვია. ინფორმაციას ამის შესახებ AP News ავრცელებს.

ამავე თემაზე: