რასელ ქროუს, რომელმაც მაყურებლებს თავი ფილმებით Gladiator და A Beautiful Mind დაამახსოვრა, თორის სერიის მეოთხე ფილმში — Thor: Love and Thunder-ში ვიხილავთ. ოსკაროსანი მსახიობი ფილმში ზევსის როლს შეასრულებს. ამის შესახებ მსახიობმა ერთ-ერთ რადიოში სტუმრად ყოფნის დროს განაცხადა. თუმცა ისიც აღსანიშნავია, რომ ჯერჯერობით რასელ ქროუს როლის შესახებ მარველს ოფიციალური ინფორმაცია არ გაუვრცელებია.

მარველის კომიქსებში ზევსი ოლიმპოელების მბრძანებელი და ბერძნული მითოლოგიის ერთ-ერთი ცენტრალური ფიგურაა. ფილმში ზევსის ყოფნა კი სხვა საინტერესო პერსონაჟების გამოჩენის ალბათობასაც ზრდის.

რასელ ქროუ ფილმში სხვა ვარსკვლავებთან — კრის ჰემსვორტთან, ნატალი პორტმანთან და კრისტიან ბეილთან ერთად ითამაშებს. მეოთხე ნაწილში კიდევ ერთხელ ვიხილავთ მეტ დეიმონს, ლუკ ჰემსვორტსა და სემ ნილს, რომლებიც მანამდე Thor:Ragnarok-ში გამოჩნდნენ.

Thor: Love and Thunder-ის რეჟისორი ტაიკა ვაიტიტია. ახალი ფილმის შინაარსის შესახებ ზუსტი დეტალები ჯერჯერობით ცნობილი არაა. თორის მეოთხე ნაწილის პრემიერა 2022 წლის 6 მაისს შედგება.