ქართული ოცნების თავმჯდომარის, ირაკლი კობახიძის განცხადებით, ოპოზიციის მხრიდან ვროპული საბჭოს პრეზიდენტის, შარლ მიშელის დოკუმენტის ხელის არმოწერა ალოგიკური, მაგრამ მოსალოდნელი იყო.

"ალოგიკურია, მაგრამ მოსალოდნელი მაინც იყო, გამომდინარე იქედან, რომ ძალიან ხშირად დგამს ხოლმე ალოგიკურ ნაბიჯებს ოპოზიცია. თავისთავად ეს რიტორიკაც არის, ბუნებრივია, წინააღმდეგობრივი. როდესაც ერთი მხრივ საუბრობენ იმაზე, რომ ეს ხელმოწერა არის დასავლეთიდან ზეწოლის შედეგი და კონკრეტულად ვაშინგტონიდან. მეორე მხრივ კი ამბობენ, რომ მაინც არ აწერენ ხელს, ეს მტკიცება და ლოგიკაც წინააღმდეგობრივია", — განაცხადა კობახიძემ იმედის ეთერში.

16 აპრილს ცნობილი გახდა, რომ ქართული ოცნება ევროპული საბჭოს პრეზიდენტის, შარლ მიშელის დოკუმენტს ხელს აწერს.

ამასთან, პარლამენტის თავმჯდომარის, არჩილ თალაკვაძის განცხადებით, ქართული ოცნება მზად არის, 40%-იანი მხარდაჭერის პრინციპი გამოიყენოს, რაც იმას ნიშნავს, რომ, თუ მმართველი პარტია თვითმმართველობის არჩევნებში 40%-ს ვერ მიიღებს, ისინი ოპოზიციის მოთხოვნებს რიგგარეშე არჩევნებთან დაკავშირებით განიხილავენ.

ამას წინ უძღოდა ქართული ოცნების თავმჯდომარის, ირაკლი კობახიძის ამერიკის შეერთებულ შტატებში ვიზიტი. კობახიძეს განცხადებით, აშშ-ში შეხვედრებისას პარტნიორები მიანიშნებენ, რომ მათ, როგორც მმართველმა პარტიამ კრიზისის გადასაჭრელად ნაბიჯები უნდა გადადგან.

30 მარტს ქართული ოცნებისა და ოპოზიციის მორიგი მედიაცია უშედეგოდ დასრულდა. მათ ევროპული საბჭოს პრეზიდენტის შარლ მიშელის წარმომადგენლის, კრისტიან დანიელსონის მიერ შეთავაზებულ დოკუმენტს ხელი არ მოაწერეს. თავდაპირველად ხელი არ მოაწერა არც მმართველმა პარტიამ.

კრისტიან დანიელსონის მიერ წარმოდგენილ დოკუმენტში საკითხები რამდენიმე პუნქტად იყო დაყოფილი. ის ეხებოდა:

  • პოლიტიზებულ მართლმსაჯულებად აღქმულ საკითხებზე რეაგირებას
  • ამბიციურ საარჩევნო რეფორმას
  • კანონის უზენაესობა/სასამართლო რეფორმას
  • პარლამენტში ძალაუფლების განაწილებას
  • მომავალ არჩევნებს

უშედეგოდ დასრულდა შეხვედრა დანიელსონის პირველი ვიზიტის დროს, 18 მარტსაც. ბოლო შეხვედრა 10 საათი გრძელდებოდა.

შვედი დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.