წელს დოლბის თეატრში შეკრებილ ვარსკვლავებს ამერიკელი ტელეწამყვანი ჯიმი კიმელი მიესალმება. არჩევანი კიმელზე ტელეარხ ABC-ის რეკომენდაციით შეჩერდა, რომელსაც დაჯილდოების ტრანსლაციის უფლება 2028 წლამდე $75 მილიონად აქვს ნაყიდი.

საინტერესოა, რამდენს უხდიან კიმელს იმისათვის, რომ კინოსამყაროს ყველაზე პრესტიჟული დაჯილდოების ცერემონია წაიყვანოს?

Variety წერს, ჯიმი კიმელის ანაზღაურება $15 000 იქნება, შეიძლება ანაზღაურება გეცოტაოთ, თავად კიმელსაც იგივე რეაქცია ჰქონდა და იხუმრა კიდეც:

"მგონი უბრალოდ არალეგალურია საერთოდ არაფერს თუ გადამიხდიან, ამიტომ მაძლევენ ასეთ ჰონორარს", - ამბობს კიმელი.

აღსანიშნავია, რომ დიდი სხვაობაა კიმელსა და ელენ დეჯენერესის ანაზღაურებას შორის, რომელმაც 2014 წელს წაიყვანა ოსკარი.

დეჯენერესს მაშინ $1 მილიონი გადაუხადეს, რაც წარმოუდგენლად დიდი ჰონორარია იმის გათვალისწინებით, რომ ამერიკის კინოაკადემიას ყოველწლიურად ოსკარის წამყვანებისთვის $15-25 ათასი აქვს გამოყოფილი.