რიონის ხეობაში ისევ პოლიციაა მობილიზებული. სამართალდამცავი უწყების წარმომადგენლები აქციის მონაწილეებს ნამოხვანში არ უშვებენ, რის გამოც კარავი სოფელ გუმათშიც გაიშალა. სწორედ აქ იმყოფებიან ახლა მოქალაქეები, რომლებიც ნამახვანის ჰესის მშენებლობას აპროტესტებენ. უშუალოდ დღევანდელი აქციის მოთხოვნა კი, ნამოხვანში აქციის მონაწილეების შესვლაა.

დილიდან, საპოლიციო ძალებთან ერთად, ადგილზეა წყლის ჭავლის მანქანაც. ვარლამ გოლეთიანმა შეკრებილებს მოუწოდა, არ შესულიყვნენ დაპირისპირებაში პოლიციელებთან. ამ დროისთვის ტერიტორიაზე სიმშვიდეა.

გოლეთიანი ესაუბრა პოლიციის წამომადგენელსაც და ჰკითხა, რატომ არ უშვებენ მოქალაქეებს ნამოხვანში. პასუხად კი მიიღო, რომ როცა "ტემპერატურა დაიწევს", ისინი სოფელში შესვლას და პროტესტის იქ გაგრძელებას შეძლებენ.

"ამ ოდენობის ხალხი იმ ხეობაში ფიზიკურად შეუძლებელია, მოსალოდნელი ესკალაციების, დაპირისპირების თავიდან აცილების მიზნით, მიზანშეწონილია, მოსალოდნელი საფრთხისგან თავის აცილების მიზნით. ჩვენ გვაძლევს ამის ლეგიტიმაციას კანონი პოლიციის შესახებ, გუშინდელი დღიდან დღეის ჩათვლით, მიზანშეწონილია, მოსალოდნელი საფრთხის თავიდან აცილების მიზნით. [...] ვიცი, რომ ეს არის დროებითი. 160 დღეს დგეხართ იქ და ხელი არავის შეუშლია. [...] ტემპერატურა დაიწევს, ვითარება დასტაბილურდება, დამშვიდდება და დღეს მშვიდობიანად გადაბრძანდით, მე გიყურებთ, გაგაცილებთ", — თქვა პოლიციის წარმომადგენელმა.

დღესვე, აქციაზე, ვარლამ გოლეთიანმა დააანონსა აქცია თბილისშიც, თუ მათი მოთხოვნები არ დაკმაყოფილდება. მას თარიღი არ დაუკონკრეტებია, თუმცა თქვა, რომ აქცია მრავალათასიანი იქნება. მანვე ხაზი გაუსვა, რომ პოლიტიკურ დღის წესრიგში არ გადადიან და იმ შემთხვევაში, თუ მათ აქციებზე პოლიტიკოსებს სურთ მისვლა, ხალხში უნდა დადგნენ, "როგორც რიგითი ადამიანები" და დაუშვებელია პოლიტიკური სიმბოლიკები, ნომრები და დროშები.

გუშინ, სამ აპრილს რონის ხეობაში ტექნიკის მუშაობის განახლებას დაპირისპირება მოჰყვა და პოლიციამ ორი ადამიანი დააკავა. აქტივისტები ამბობენ, რომ ენკამ სამუშაოები განაახლა, კომპანიის განცხადებით კი, ეს წინამოსამზადებელი სამუშაოებია.

პოლიციას სოფელში შესასვლელი მთელი დღის განმავლობაში ჩაკეტილი ჰქონდა და მოქალაქეებს ჰესის მოწინააღმდეგეთა კარვებთან არ უშვებდა. ამასთან, ადგილზე მყოფი ადამიანები ამბობენ, რომ შსს სიგნალს ახშობს, რის გამოც კომუნიკაცია შეუძლებელია. თუმცა შსს ამტკიცებს, რომ ადგილზე მყოფი სპეციალური სატრანსპორტო საშუალება რადიოკავშირის გამართულ მუშაობას უზრუნველყოფს.

მომხდართან დაკავშირებით განცხადება გაავრცელა სახალხო დამცველმა. ომბუდსმენი შსს-ს მოუწოდებს აღადგინოს გადაადგილება, არ ჩაახშოს სიგნალი, ხოლო მთავრობას — შეაჩეროს სამუშაოები კონსენსუსამდე.