ნაციონალური მოძრაობის ერთ-ერთი ლიდერის, თინა ბოკუჩავას განცხადებით, ოპოზიციის შეხვედრაზე 2 მარტის საპროტესტო აქციის გეგმები განიხილეს. მისი თქმით, ოპოზიციის წარმომადგენლები აპირებენ, რომ გზის სავალ ნაწილზე დასხდნენ, რათა დეპუტატებს მანქანით გადაადგილებისას "დისკომფორტი" შეუქმნან. მისი თქმით, პარლამენტარებს ხალხის ხმის გაგონება და შენობაში ფეხით შევლა მოუწევთ.

"ძირითადად ვისაუბრეთ 2 მარტის აქციაზე, რომელიც გაიმართება პარლამენტის შენობასთან. ეს იქნება პიკეტირების აქცია. ეს მიზნად არ ისახავს, რომ დეპუტატებს შეეზღუდოთ შესვლის შესაძლებლობა, თუმცა, აუცილებლად შევუქმნით დისკომფორტს პროტესტის მშვიდობიანი ფორმით, რომელიც ძალიან ბევრ ქვეყანაში გამოიყენება, როდესაც პროტესტანტები, მათ შორის, მაგალითად, გზის სავალ ნაწილზე სხდებიან, იმისთვის რომ მანქანით გადაადგილება არ იყოს შესაძლებელი. თუმცა, რა თქმა უნდა, შეუძლიათ, გადმოსხდნენ თავიანთი ძვირადღირებული ავტომობილებიდან და საფეხმავლო გზით თავისუფლად შევიდნენ სამუშაო ადგილას.

საქართველოს კანონმდებლობა ითვალისწინებს პროტესტის ამ ფორმას, რომ ჩვენ შევძლოთ მათთვის დისკომფორტის შექმნა. თუმცა, არ შევუზღუდოთ გადაადგილების თავისუფლება და არ შევუზღუდოთ იმის შესაძლებლობა, რომ შევიდნენ პარლამენტში. მაგრამ აუცილებლად შევუქმნათ დისკომფორტი, იმიტომ რომ ჩვენი ამოსავალი წერტილია სწორედ ეს დისკომფორტი იგრძნოს აბსოლუტურად ყველა ადამიანმა, ვინც ახლა მიდის პარლამენტში, რომელიც არ წარმოადგენს ქართველი ხალხის ნებას, რომელიც რეალურად არ არის კანონმდებელი, რომელიც რეალურად მხოლოდ და მხოლოდ, ბიძინა ივანიშვილის ნების აღმსრულებელია და მხოლოდ მისი ხმა ესმის და ახლა ჩვენი ამოცანაა, რომ ხალხის ხმაც გავაგონოთ ჩვენი მშვიდობიანი პროტესტით

ფეხით შებრძანდნენ პარლამენტში და სანამ შევლენ მოისმინონ ადამიანების ხმა, პროტესტის ხმა", — თქვა მან.

დღეს ნაციონალური მოძრაობის ოფისში ოპოზიციის შეხვედრა მიმდინარეობდა. უახლოეს ორ კვირაში ოპოზიცია რამდენიმე აქციას, ასევე, ორი შენობის პიკეტირებას გეგმავს. აქციები 2 მარტს პარლამენტთან იწყება და მთელი კვირის მანძილზე სხვადასხვა ადგილზე გაგრძელდება. მათ შორის, მთავრობის ადმინისტრაციასთან, შინაგან საქმეთა სამინისტროსთან და სასამართლოსთან.