აშშ-ის სენატმა კაპიტოლიუმზე თავდასხმის წახალისებაში პრეზიდენტი დონალდ ტრამპი გაამართლა და ამით იმპიჩმენტის პროცედურა დაასრულა. გამამტყუნებელი განაჩენისთვის სენატში ხმების საკმარისი რაოდენობა ვერ შეგროვდა.

ტრამპის გასამტყუნებლად საჭირო იყო 100 სენატორიდან 2/3-ის მხარდაჭერა. მის წინააღმდეგ ხმა 57-მა სენატორმა მისცა, მათ შორის ზოგმა რესპუბლიკელმა, თუმცა ეს საკმარისი არ აღმოჩნდა. ყოფილ პრეზიდენტს 43-მა რესპუბლიკელმა სენატორმა დაუჭირა მხარი.

ტრამპის საიმპიჩმენტო პროცედურა სენატში კვირის დასაწყისში განახლდა. თავდაპირველად ფიქრობდნენ, რომ დემოკრატიული პარტია მოწმეებს გამოკითხავდა, რაც პროცესს გაწელავდა, თუმცა საბოლოოდ მათ მოწმეებზე უარი თქვეს. ამასთან, სენატში გამოკითხვაზე უარი თქვა თავად დონალდ ტრამპმაც.

დონალდ ტრამპი აშშ-ს ისტორიაში მეორე პრეზიდენტია, რომელსაც წარმომადგენელთა პალატამ იმპიჩმენტი გამოუცხადა.

კონგრესის ქვედა პალატაში, სადაც უმრავლესობაში დემოკრატები არიან, ტრამპს იმპიჩმენტი უფლებამოსილების შეწყვეტამდე ერთი კვირით ადრე, 13 იანვარს გამოუცხადეს. ამის მიზეზი კი 6 იანვარს კაპიტოლიუმზე თავდასხმა გახდა, რომელშიც ტრამპის მხარდამჭერები მონაწილეობდნენ.

დემოკრატი და ზოგიერთი რესპუბლიკელი კონგრესმენიც აცხადებდა, რომ ტრამპის არჩევნებში წაგებასთან ტრამპის შეუგუებლობამ და მოწოდებებმა კაპიტოლიუმზე თავდასხმა გამოიწვიეს.