აშშ-ს პრეზიდენტმა ჯო ბაიდენმა რუსი პოლიტიკოსის, ალექსეი ნავალნის დაუყოვნებლივ გათავისუფლება მოითხოვა. ამის შესახებ მან სახელმწიფო დეპარტამენტში შეხვედრისას განაცხადა.

ბაიდენმა რუსეთის პრეზიდენტ ვალადიმერ პუტინთან სატელეფონო საუბარიც გაიხსენა. მისი თქმით, საუბრისას მან ხაზი გაუსვა, რომ დრო, როცა აშშ რუსეთის აქტიურობის წინაშე ნებდებოდა, დასრულდა. გარდა ამისა, მან კიდევ ერთხელ აღნიშნა, რომ რუსეთი მზადაა ამერიკულ დემოკრატიას ზიანი მიაყენოს.

"ჩვენ ეფექტურად აღვუდგებით რუსეთს, თუ ჩვენს პარტნიორებთან ერთად კოორდინირებულად ვიმუშავებთ", — დაამატა მან.

2 თებერვალს მოსკოვის სასამართლომ ალექსეი ნავალნის პირობითი მსჯავრი რეალურით ჩაანაცვლა და მას 2 წლითა და რვა თვით თავისუფლების აღკვეთა მიუსაჯა. სასამართლომ მიიჩნია, რომ ნავალნი პირობითი გათავისუფლების წესებს არღვევდა, ამიტომ დარჩენილი ვადა პატიმრობაზე შეუცვალა.

ალექსეი ნავალნი მოსკოვის აეროპორტში 17 იანვარს დააკავეს, როცა ის გერმანიიდან ბრუნდებოდა, სადაც ნოვიჩოკით მოწამვლის შემდეგ მკურნალობდა. დაკავებიდან მეორე დღეს პოლიციის განყოფილებაში გამართულ სასამართლო პროცესზე მას 30-დღიანი პატიმრობა შეუფარდეს.

11 იანვარს რუსეთში სასჯელის აღსრულების ფედერალურმა ბიურომ სასამართლოს მიმართა, რომ ნავალნის პირობითი მსჯავრი, რომელიც მან ივ როშეს საქმეზე მიიღო, რეალურით ჩანაცვლდეს. ამასთან, რუსეთში ოპოზიციონერის წინააღმდეგ თაღლითობის მუხლით საქმე აღძრეს. საგამოძიებო უწყებები მას საკუთარი ფონდებიდან ფულის გაფლანგავს ედავებიან.