მოძრაობა ხალხისთვის ლიდერი ანა დოლიძე ფეისბუქგვერდზე ქართული ოცნების დეპუტატის, ირაკლი ზარქუას ფოტომონტაჟს აქვეყნებს, რომელშიც ის გლადიატორის პერსონაჟს ჰგავს. დოლიძე წერს, რომ ხედავს, როგორ ყალიბდება "ნორჩი ლენინელი" ზარქუა ქართული დემოკრატიის "დარაჯად".

"ოპოზიციის პარლამენტში არყოფნის პერიოდში ქართული პარლამენტარიზმი ეტყობა მის იმედზეა. რა ცეცხლს დააყენებს, რა პაექრობას ხოლმე თავისი კრიტიკული კითხვებით საკუთარ მინისტრებთან!" — წერს ის.

დღეს, 2 თებერვალს ზარქუამ განაცხადა, რომ პატარა ოპოზიციურ პარტიებს კიდევ ერთი შანსი უნდა მიეცეთ დაფიქრდნენ და გადაწყვიტონ პარლამენტში შესვლა. ამის შესახებ მან ქართული ოცნების ოფისში უმრავლესობის სხდომაზე შესვლამდე ისაუბრა.

გუშინ, ქართული ოცნების პოლიტსაბჭოს სხდომის შემდეგ, პარტიის აღმასრულებელმა მდივანმა, მამუკა მდინარაძემ განაცხადა, რომ ოპოზიციონერი დეპუტატების მანდატებთან დაკავშირებით "მყარად და მკაფიოდ" ჩამოაყალიბეს პოზიცია, რომელსაც მხოლოდ მას შემდეგ გაახმოვანებენ, რაც საპარლამენტო უმრავლესობის წევრები ამ გადაწყვეტილებას დაადასტურებენ, ან უარყოფენ.

დღეს, 2 თებერვალს, პარლამენტის საგაზაფხულო სესია გაიხსნება. პლენარული სხდომაზე განსახილველი ერთადერთი საკითხი ოპოზიციონერი დეპუტატების უფლებამოსილების შეწყვეტაა.

პარლამენტის თავმჯდომარემ, არჩილ თალაკვაძემ 30 იანვარს განაცხადა, რომ ოპოზიციისთვის მანდატების შეწყვეტაზე კენჭისყრა ვერ და არ გადაიდება. მისი თქმით, სურვილი აქვთ, პარლამენტი ისე იყოს წარმოდგენილი, როგორც საზოგადოებამ აირჩია, მაგრამ უკვე 3 თვე გავიდა, იყო არაერთი მოლაპარაკება და ოპოზიციას შესვლის სურვილი არ აქვს.