რუსეთის ფედერაციის პრეზიდენტ ვლადიმერ პუტინთან გამართულ შეხვედრაზე სომხეთის პრემიერმინისტრი, ნიკოლ ფაშინიანი და აზერბაიჯანის პრეზიდენტი ილჰამ ალიევი სატრანსპორტო კავშირების განვითარებაზე შეთანხმდნენ. პუტინთან ორმხრივი მოლაპარაკებების შემდეგ გამართულ პრესკონფერენციაზე ალიევმა სატრანსპორტო კომუნიკაციების განბლოკვის მნიშვნელობაზე ისაუბრა. მისი თქმით, 30 წლის შემდეგ, აზერბაიჯანი ნახიჩევანის ავტონომიურ რესპუბლიკასთან სომხეთის ტერიტორიის სატრანსპორტო კომუნიკაციების საშუალებით დაუკავშირდება. სომხეთს კი სარკინიგზო კავშირი რუსეთთან და ირანთან აზერბაიჯანის ტერიტორიის გავლით ექნება.

"ჩვენ თურქეთის ბაზარზე წვდომა ნახიჩევანის ავტონომიური რესპუბლიკის გავლით გვექნება. ასევე, თურქეთის და რუსეთის რკინიგზები ერთმანეთს დაუკავშირდებიან. ანუ, ეს განცხადება დიდ პერსპექტივებს ქმნის", — განაცხადა ალიევმა.

მხარეებმა, ასევე, სამმხრივი სამუშაო ჯგუფის შექმნა დაამტკიცეს. ამის შესახებ განცხადება კრემლის ოფიციალურ ვებგვერდზე გამოქვეყნდა.

შეთანხმების თანახმად, სამუშაო ჯგუფი პირველ შეხვედრას 2021 წლის 30 იანვრამდე გამართავს. პირველი შეხვედრის შედეგების მიხედვით პრიორიტეტად სარკინიგზო და საგზაო კომუნიკაციების საკითხზე საუბარი იქნება. საუბარია, ასევე, ბაქოსა და ერევანს შორის მიღწეული სხვა შეთანხმების განხილვებზე. სამუშაო ჯგუფის კოორდინატორები, აგრეთვე, ექსპერტთა ქვეჯგუფების შემადგენლობას დაამტკიცებენ.

რუსეთის ფედერაციის დედაქალაქ მოსკოვში სამმხრივი შეხვედრა დღეს, 11 იანვარს გაიმართა.

2020 წლის სექტემბრის ბოლოს აზერბაიჯანმა და სომხეთმა მთიან ყარაბაღში შეტაკებები განაახლეს და პროვოკაციებში ერთმანეთს ადანაშაულებდნენ. 40-დღიანი ომის შემდეგ, 9-10 ნოემბერს, გვიან ღამით, მოულოდნელად, სომხეთმა, აზერბაიჯანმა და რუსეთმა სამშვიდობო შეთანხმებას მოაწერეს ხელი. სომხეთს აზერბაიჯანისთვის ტერიტორიების გადაცემა მოუწია, ხოლო ლაჩინში შეიქმნა დერეფანი, სადაც რუსი სამშვიდობოები განლაგდნენ.

სომხეთისთვის ომის არასახარბიელოდ დასრულების გამო, ერთ დროს მოსახლეობისგან მხარდაჭერილი პრემიერმინისტრის, ნიკოლ ფაშინიანის წინააღმდეგ საპროტესტო აქციები მიმდინარეობს. ოპოზიცია და აქტივისტები მის გადადგომასა და ვადამდელი არჩევნების ჩატარებას მოითხოვენ.