პარლამენტში დღეს, 19 მაისს, იურიდიულ საკითხთა კომიტეტზე განიხილეს კანონპროექტი, რომელიც ბავშვზე ძალადობის შემთხვევებისას, სოციალურ მუშაკს უფლებას ანიჭებს, ბავშვი მოძალადისგან განაცალკევოს.

ამჟამად, ბავშვისა და მოძალადე მშობლის განცალკევება მხოლოდ სასამართლოს შეუძლია.

„ოჯახში ძალადობის აღკვეთის, ოჯახში ძალადობის მსხვერპლთა
დაცვისა და დახმარების შესახებ“ კანონპროექტის ინიციატორები არიან ჯანდაცვისა და იუსტიციის სამინისტროები. მათი განმარტებით, კანონპროექტის მიზანია, ბავშვებზე ძალადობის შემთხვევაში, სოციალური მუშაკის როლის გაძლიერება და მისი ჩართულობის გაზრდა.

ცვლილების მიხედვით, მშობლის გარდა, მოძალადედ შეიძლება ჩაითვალოს ნებისმიერი სხვა პირი რომელიც ბავშვზე ძალადობს სხვადასხვა ფორმით.

"ქუჩაში მცხოვრებ და მომუშავე ბავშვების მიმართ განხორციელებულ ძალადობის შემთხვევაში, ხშირად, შეუძლებელია იმის დადგენა, მოძალადე არასრულწლოვნის მშობელია, თუ სხვა კანონიერი წარმომადგენელი. სწორედ ასეთი შემთხვევისათვის მნიშვნელოვანია, საკანონმდებლო დონეზე სოციალურ მუშაკს ჰქონდეს უფლებამოსილება, მშობლისა და სხვა კანონიერი წარმომადგენლის გარდა, სხვა პირის მიერ ბავშვზე ძალადობის შემთხვევაში, მოახდინოს რეაგირება და არასრულწლოვანი განაცალკევოს მოძალადისაგან", - ნათქვამია კანონპროექტის განმარტებით ბარათში.