მოძრაობა ხალხისთვის ლიდერი ანა დოლიძე ფიქრობს, რომ შიდა პოლიტიკურ პროცესებში ელჩებს ზედმეტად დიდ როლს ვანიჭებთ. მისი თქმით, ცხადია, რომ დიპლომატის რჩევა იქნება დიპლომატიური და ოპოზიციამ თავისი დღის წესრიგით უნდა იმოქმედოს.

"რა თქმა უნდა, ჩვენი პარტნიორების რეკომენდაციები მნიშვნელოვანია, ისინი არიან დიპლომატები. ესენი არ არიან პოლიტიკური სტრატეგები. მემგონი, ძალიან ბევრ რეკომენდაციას, ჩემი პერსპექტივით, ზედმეტად დიდ როლს ვანიჭებთ ჩვენ ელჩებს, სხვათა შორის, შიდა პოლიტიკურ პროცესებში", — განაცხადა მან რუსთავი 2-ის ეთერში.

მისივე თქმით, უკეთესი იქნება ფასილიტატორის როლს პრეზიდენტი თუ შეითავსებს.

"უშუალოდ, ტაქტიკურ ეტაპებზე, ელჩები რომლებიც, დიდი მადლობა მათ, გვთავაზობენ ძალიან სერიოზულ მხარდაჭერას და სერვისს, მე უფრო კმაყოფილი ვიქნებოდი როგორც საქართველოს მოქალაქე, ჩვენს პოლიტიკურ სპექტრს, მათ შორის, ბატომ თუ ქალბატონ პრეზიდენტს, რა სტატუსიც არ უნდა ჰქონდეს, თვითონ რომ ჰქონდეს შესაძლებლობა, რომ გასწიოს ეს შუამავლობა. რატომ უნდა გვჭირდებოდეს ჩვენ ელჩების შუამავლობა", — განაცხადა მან.

ის ფიქრობს, რომ ოპოზიციამ პოლიტიკური წნეხი უნდა გააძლიეროს და "აწიოს ტემპერატურა", მათ შორის აქციებით.

საქართველოში მყოფმა ელჩებმა არაერთხელ იტვირთეს ფასილიტატორის ფუნქცია, როცა ოპოზიცია და მმართველი გუნდი ჩიხში შევიდა და პროცესები მასიურ აქციებში გადაიზარდა. ოპოზიცია ამ დრომდე ჩართულია მოლაპარაკებებში, რომელსაც ელჩები აწარმოებენ — განხილვის თემა 31 ოქტომბრის არჩევნების შედეგები და პარლამენტში შესვლა-არშესვლის საკითხია. ამ ეტაპზე შეხვედრების 5 რაუნდი გაიმართა და მე-6 რაუნდის მოლოდინია.