მოქალაქეების ერთ-ერთი ლიდერის, ლევან იოსელიანის განცხადებით, გიგა ბოკერია არ უნდა საუბრობდეს მთელი ოპოზიციის სახელით, რადგან მას ამის მანდატი არ აქვს. ეს განცხადება იოსელიანმა რუსთავი 2-ის ეთერში გააკეთა.

"ბატონი გიგა ბოკერია საუბრობს მთელი ოპოზიციის სახელით, მან მთელი ოპოზიციის სახელით გამოგვიტანა განაჩენი, რომ ჩვენ აღარ ვართ ოპოზიციის ნაწილი, რაც არის ჩვენთვის პრინციპულად მიუღებელი. არა იმიტომ, რომ მან თავისი აზრი თქვა, არამედ იმიტომ, რომ მას არ ჰქონდა მანდატი, ყველა პარტიის სახელით ესაუბრა და ეს კიდევ ადასტურებს იმას, რომ მას უნდა, ყველას სახელით მოახდინოს მისი აზრის გაჟღერება, რასაც ბევრი ოპოზიციაში არ ეთანხმება", — თქვა იოსელიანმა.

როგორც ევროპული საქართველოს ერთ-ერთმა ლიდერმა, გიგა ბოკერიამ განაცხადა, ალეკო ელისაშვილი ოპოზიციაში აღარ ითვლება და შეუძლია კობახიძესთან ერთად იაროს ელჩებთან შეხვედრაზე.