აფრიკის დასახლებაში სახლების დემონტაჟის დროს, რასაც მოსახლეობის პროტესტი და პოლიციასთან დაპირისპირება მოჰყვა, ორსული ქალიც დაშავდა.

ის სასწრაფო დახმარების ბრიგადამ კლინიკა ღია გულში გადაიყვანა. როგორც კლინიკაში On.ge-ს უთხრეს, ქალის ჯანმრთელობის მდგომარეობა დამაკმაყოფილებელია და მას უახლოეს პერიოდში გაწერენ.

კლინიკაში არ ადასტურებენ ინფორმაციას იმის შესახებ, რომ ქალს მუცელი მოეშალა.

დღეს თბილისის მერიამ სამგორის რაიონში, აფრიკის დასახლებაში უკანონო შენობების დემონტაჟი დაიწყო. მათი ინფორმაციით, სახელმწიფოს საკუთრებაში არსებულ მიწის ნაკვეთზე, სამშენებლო სამართალდარღვევის 12 ფაქტი გამოვლინდა. ტერიტორიაზე სპეციალური ტექნიკის შეყვანას მოსახლეობის პროტესტი მოჰყვა, ადგილზე რამდენიმე საათის განმავლობაში მობილიზებული იყო პოლიციაც. იყო პოლიციასა და მოქალაქეებს შორის დაპირისპირების რამდენიმე შემთხვევა. შსს-ს ინფორმაციით, დაკავებულია 8 ადამიანი.

აფრიკის დასახლებაში მიმდინარე პროცესებზე საუბრისას, თბილისის მერმა, კახა კალაძემ განაცხადა, რომ იქ გამოსულ მოსახლეობას აქვს სახლები და მიწები და ისინი მიზანმიმართულად ცდილობენ მიწების დატაცებს.

ამავე თემაზე: