სტრატეგია აღმაშენებლის ერთ-ერთი ლიდერის, თაკო ჩარკვიანის თქმით, თავადაა ბოიკოტის იდეის ავტორი, ამიტომ პარტია პარლამენტში არ შედის. ასე გამოეხმაურა იგი გავრცელებულ ინფორმაციას, რომ სტრატეგია აღმაშენებელი პარლამენტში შესვლას დათანხმდა.

"მე ვარ ამ იდეის უპირველესი ავტორი, დილის ოთხ საათზე. რომელ შესვლაზეა ლაპარაკი? მორალურად, რომ სრულიად აცდენილია, ეს ცალკე თემაა, მაგრამ პოლიტიკურადაც დასამარებაა [...] სამართლებრივად დანაშაულია ჩადენილი, გაყალბდა არჩევნები. ოპოზიცია უკვე კარგა ხანია ამაზე შეთანხმდა და ახლა შენ თუ გამყალბებელს შეჰყვები დანაშაულის ქმედებაში, შენ თავად აღმოჩნდები დანაშაულის თანამონაწილე", — განაცხადა მან TV პირველის ეთერში.

დღეს ოპოზიციასა და მმართველ პარტიას შორის მოლაპარაკებების მეოთხე რაუნდი მიმდინარეობს. ვრცელდება ინფორმაცია რამდენიმე პარტიის პარლამენტში შესვლის შესახებ, მათ შორის, სტრატეგია აღმაშენებელიც იყო. თუმცა პარტიები ამას არ ადასტურებენ. შეხვედრა აშშ-ს ელჩის რეზიდენციაში რამდენიმე საათია უკვე მიმდინარეობს.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს და ბოიკოტი გამოუცხადეს არჩევნების მეორე ტურსაც, რომელიც 21 ნოემბერს ჩატარდა. მასში არცერთი ოპოზიციური პარტია მონაწილეობდა. 17 მაჟორიტარულ ოლქის გარდა, მეორე ტური გაიმართა ქუთაისის მერობის არჩევნებზეც. როგორც მოსალოდნელი, ოპოზიციის გარეშე ჩატარებულ არჩევნებში, სახელისუფლებო პარტიამ გაიმარჯვა.

პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს. ოპოზიციაში აცხადებენ, რომ მათი მოთხოვნები არ იცვლება და რიგგარეშე არჩევნებს მოითხოვენ. თავისი პოზიციების დათმობაზე უარს ამბობს ხელისუფლებაც. როგორც ქართულ ოცნებაში განმარტავენ, რიგგარეშე არჩევნების ჩატარებას არც განიხილავენ.

მესამე რაუნდი 7 დეკემბერს შედგა. ოპოზიციისა და მმართველი პარტიის წინადადებები მხარეებმა პუნქტებად განიხილეს. როგორც შეხვედრის დასრულების შემდეგ მათ განაცხადეს, იყო პუნქტები, რომლებზეც თანხვედრა მოხდა, თუმცა დარჩა რამდენიმე პრინციპული პუნქტი, რაზეც ჯერ ვერ შეთანხმდნენ. ამის ფონზე, ქართული ოცნების ლიდერები აცხადებენ, რომ მათი განწყობა პოზიტიურია და სჯერათ — მომავალ წელს პარლამენტში ყველა დეპუტატი იქნება.

ამავე თემაზე: