საერთაშორისო ოლიმპიურმა კომიტეტმა მისი ეგიდით ჩატარებულ ყველა ღონისძიებას ბელარუსის ეროვნული ოლიმპიური კომიტეტის აღმასრულებელი საბჭოს წევრები ჩამოაშორა. აღმასრულებელ კომიტეტს პრეზიდენტი ალექსანდრ ლუკაშენკო ხელმძღვანელობს.

ამასთან, ბელარუსის კომიტეტისთვის შეწყვეტილია ყველა ფინანსური დახმარება გარდა იმ თანხებისა, რომელიც ტოკიოს ოლიმპიური თამაშებისთვისა და პეკინის ზამთრის თამაშებისთვის ბელარუსი სპორტსმენების მომზადებას ეხება. როგორც საერთაშორისო ოლიმპიურ კომიტეტში ამბობენ, გადაწყვეტილება დროებითია და სიტუაციის ცვლილების შესაბამისად გადაიხედება.

როგორც რადიო თავისუფლების რუსული ბიურო წერს, აქამდე საერთაშორისო ოლიმპიური კომიტეტი ბელარუსის ხელისუფლების მხრიდან სპორტსმენების დევნას იძიებდა.

აგვისტოში 1,5 ათასზე მეტმა სპორტსმენმა ხელი მოაწერა ღია წერილს, რომლითაც ისინი ახალი საპრეზიდენტო არჩევნების ჩატარებასა და აქციის მონაწილეების მიმართ ძალადობის შეწყვეტას მოითხოვდნენ. წერილის გამოქვეყნების შემდეგ ბევრი მათგანი გაათავისუფლეს, დააკავეს ან გაასამართლეს.

ბელარუსში ყოველდღიური საპროტესტო აქციები დაიწყო 9 აგვისტოს გამართული საპრეზიდენტო არჩევნების შემდეგ, რომლის გამარჯვებულადაც ლუკაშენკო გამოცხადდა. დემონსტრანტები ლუკაშენკოს გადადგომას და ხელახალი არჩევნების ჩატარებას მოითხოვენ.