პარლამენტთან ხმაურია, პოლიცია აქციის მონაწილეებს აკავებს. კადრებში ჩანს, რომ ერთ-ერთი აქტივისტი პოლიციის მანქანაში ჩასვეს. იყო დაპირისპირებაც აქციის მონაწილეებსა და პოლიციას შორის.

აქტივისტების განცხადებით, მათ რკინის დროებით კედელზე წარწერის გაკეთებისა და სტიკერების გაკვრის საშუალება არ მისცეს. მათივე ინფორმაციით, დაკავებულია ორი ადამიანი.

On.ge ცდილობს შსს-სთან დააზუსტოს, რამდენი ადამიანი დააკავეს აქციაზე და რა გახდა ამის მიზეზი.

პარლამენტთან აქცია რამდენიმე დღეა მიმდინარეობს. აქტივისტებს გაშლილი აქვთ რამდენიმე კარავი და ტერიტორიაზე 24 საათის განმავლობაში რჩებიან. ისინი არჩევნების შედეგებს აპროტესტებენ და ხელახალ არჩევნებს ითხოვენ.

განახლება: შინაგან საქმეთა სამინისტროს ინფორმაციით, აქციაზე ორი ადამიანი ადმინისტრაციულ სამართალდარღვევათა კოდექსის 173-ე მუხლით დააკავეს, რაც პოლიციელის მოთხოვნისადმი დაუმორჩილებლობას გულისხმობს.