იუსტიციის ყოფილი მინისტრის, თეა წულუკიანის თქმით, ქართულ ოცნებას რაღაცები დაუფასდა, რაღაცები კი შეეშალა. ამის შესახებ მან POSTV-ის ეთერში ისაუბრა.

"48% რომ დავინახე, რა თქმა უნდა, ეს არ იყო ჩემი მოლოდინი, მაგრამ რა გზა არსებობს დემოკრატიაში გარდა იმისა, რომ ეს არის, ესე იგი, ჩვენ რაღაც დავაკელით, რაღაცები შეგვეშალა, რაღაცები დაგვიფასდა. ელემენტარული დემოკრატიული პროცესია. ზოგიერთ ოლქში მოლოდინები გამართლდა, უმეტესობაში ვერა. თუ ნორმალური პარტია ხარ, ამის ანალიზი უნდა მოხდეს, შეცდომები უნდა გასწორდეს", — განაცხადა წულუკიანმა.

ცენტრალური საარჩევნო კომისიის მონაცემებით, 31 ოქტომბერს გამართულ საპარლამენტო არჩევნებში ქართულმა ოცნებამ 48% აიღო.

დღეს, 21 ნოემბერს 17 მაჟორიტარულ ოლქში არჩევნების მეორე ტური იმართება, რომელსაც ოპოზიცია ბოიკოტს უცხადებს. ბარიერგადალახულმა ოპოზიციურმა რვა პარტიამ მაჟორიტარული არჩევნების მეორე ტურში მონაწილეობაზე უარი თქვა და განაცხადა, რომ არც პარლამენტში შევა. ტექნიკურად მათი სახელები ბიულეტენებში ჩაწერილი იქნება, თუმცა, როგორც ოპოზიციაში ამბობენ, მათ არც საარჩევნო კამპანია ჩაუტარებიათ და საჯაროდაც მოქალაქეებს მოუწოდებენ, არ წავიდნენ არჩევნებზე.

არჩევნების დღეს ოპოზიცია აქციის ჩატარებას გეგმავდა, თუმცა საბოლოოდ მათ გადაწყვიტეს, რომ საპროტესტო ღონისძიებებს არ ჩაატარებდნენ და სრულ იგნორირებას გამოუცხადებდნენ.

ამ ხნის განმავლობაში მმართველ გუნდში ამტკიცებდნენ, რომ ოპოზიცია მეორე ტურისთვის კოორდინატორებისა და ამომრჩევლის მობილიზებას აპირებდა.

ამასთან, პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს. ოპოზიციაში აცხადებენ, რომ მათი მოთხოვნები არ იცვლება და რიგგარეშე არჩევნებს მოითხოვენ. თავისი პოზიციების დათმობაზე უარს ამბობს ხელისუფლებაც. როგორც ქართულ ოცნებაში განმარტავენ, რიგგარეშე არჩევნების ჩატარებას არც განიხილავენ.