პარტია მოქალაქეების ლიდერი, ალეკო ელისაშვილი აცხადებს, რომ პოლიტიკური კრიზისის განმუხტვა იქნება არა რომელიმე მხარის, არამედ საქართველოს გამარჯვება. ევროკავშირის ელჩის, კარლ ჰარცელის რეზიდენციიდან გამოსვლის შემდეგ, ელისაშვილმა ასევე განაცხადა, რომ აღფრთვოანებულია ელჩების მონდომებით, იპოვონ შეხების წერტილები ოპოზიციასა და ქართულ ოცნებას შორის.

"შეუძლებელია, რომ აღფრთოვანების გარეშე ილაპარაკო იმ ძალისხმევაზე, რასაც ეწევიან ელჩები. უბრალოდ აღაფრთოვანებს ადამიანს, როგორი მონდომებულები არიან ელჩები, რომ ვითარება განიმუხტოს, როგორც ცდილობენ, რომ ოპოზიციის და ქართული ოცნების პოზიციები დაახლოვდეს და შეხების წერტილები მოიძებნოს.

ჩვენ ჩვენი პოზიცია ვუთხარით. ვუთხარით როგორ ვხედავთ ჩვენ პოლიტიკურ გამოსავალს ამ კრიზისიდან. რა თქმა უნდა, რისკებზე ვისაუბრეთ და ახლა, ნამდვილად, ჯერი ქართულ ოცნებაზეა. მაზდ ვართ, მოვისმინოთ კონსტრუქციული და გონივრული პოზიცია ქართული ოცნების. მეც, ჩემდა წილად ვიტყვი, რომ თუ პოლიტიკური კრიზისი განიმუხტება, ეს იქნება არა რომელიმე მხარის გამარჯვება ან დამარცხება, არამედ გაიმარჯვებს საქართველო", — განაცხადა ალეკო ელისაშვილმა.

დღეს, 20 ნოემბერს, საპარლამენტო არჩევნების მეორე ტურამდე ერთი დღით ადრე, ოპოზიციური პარტიების წარმომადგენლები ცალ-ცალკე ხვდებიან ევროკავშირისა და აშშ-ს ელჩებს საქართველოში, კარლ ჰარცელსა და კელი დეგნანს.

31 ოქტომბრის საპარლამენტო არჩევნების შედეგებს ოპოზიცია არ აღიარებს, მანდატებზე უარს ამბობს და ხელახალი, ან რიგგარეშე არჩევნების ჩატარებას ითხოვს. პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს.

გაიგეთ მეტი: