საერთაშორისო გამჭვირვალობა — საქართველო 42 საარჩევნო უბნის შედეგების გაბათილებას და ხელახლა დათვლას სასამართლოს გზით ითხოვს. ორგანიზაციაში აღნიშნავენ, რომ ამ უბნებზე განსაკუთრებულად პრობლემური შემთხვევები იყო.

31 ოქტომბრის საპარლამენტო არჩევნებთან დაკავშირებულ დარღვევებზე TI-მ საუბნო და საოლქო კომისიებში ჯამში 108 საჩივარი შეიტანა. ორგანიზაციის ინფორმაციით, მათ შორის იყო არჩევნების დღეს დაფიქსირებულ პროცედურული დარღვევები, შემაჯამებელ ოქმებში დაფიქსირებული დისბალანსი და სხვა.

TI-ის ინფორმაციით, დისბალანსი 62 უბანზე აღმოაჩინეს და გაბათილება მოითხოვეს, თუმცა 40 საჩივარი არ დაკმაყოფილდა, 19 არ განიხილეს და მხოლოდ სამ უბანზე საოლქო საარჩევნო კომისიამ ბიულეტენები გადაითვალა.

მაგალითად, როგორც ორგანიზაციაში ამბობენ, საბურთალოს 03.03.52 უბანზე გადათვლის შედეგად აღმოჩნდა, რომ:

• გიორგი ვაშაძე — სტრატეგია აღმაშენებლის მიღებული ხმების გრაფაში ეწერა ციფრი სამი, ხოლო გადათვლის შედეგად აღმოჩნდა 33 ბიულეტენი;
• ალეკო ელისაშვილი — მოქალაქეების გრაფაში ეწერა 2, გადათვლის შედეგად აღმოჩნდა 42 ბიულეტენი;
• დავით თარხან-მოურავი, ირმა ინაშვილი – საქართველოს პატრიოტთა ალიანსის გრაფაში ეწერა 1, გადათვლის შედეგად აღმოჩნდა 21 ბიულეტენი.

გარდა ამისა, TI-ში აღნიშნავენ, რომ დიდუბის 06.07.25 უბანზე საარჩევნო ურნაში 19-ით ნაკლები ბიულტენი იყო, ისინი დაკარგულად ჩაითვალა და საოლქო კომისიამ შემაჯამებელი ოქმი დააკორექტირა.

ორგანიზაციის ინფორმაციით, შემაჯამებელ ოქმში დისბალანსი იყო ბათუმის 29.79.19 უბანზეც — ამომჩეველთა რაოდენობა 1 334-ით აჭარბებდა სარეგისტრაციო ჟურნალებში ამომჩევლების ხელმოწერების რაოდენობას. TI-ში ამბობენ, რომ საოლქო კომისიამ გადათვლის შედეგად ახალი ოქმი შეადგინა.

საერთაშორისო გამჭვირვალობა — საქართველომ, სამართლიან არჩევნებთან ერთად, განცხადება ხმების გადათვლის შესახებ მანამდეც გაავრცელა. ISFED და TI მოუწოდებდნენ საოლქო საარჩევნო კომისიებს, არ შეექმნათ ხელოვნური ბარიერი სადამკვირვებლო ორგანიზაციების მიერ წარდგენილი საჩივრების განხილვასთან დაკავშირებით.

ამასთან, არასამთავრობო ორგანიზაცია სამართლიანი არჩევნების ინფორმაციით, ოქმების დისბალანსი საარჩევნო უბნების 8 პროცენტზე დაფიქსირდა. მათივე განცხადებით, ამ ტენდენციას შესაძლოა გარკვეული გავლენა მოეხდინა საარჩევნო სუბიექტების მიერ ნაჩვენებ შედეგებზე, კერძოდ, მაქსიმალური გავლენა იქნებოდა 4,1%-ზე ნაკლები.

ოპოზიცია არჩევნების შედეგებს უკვე 5 დღეა, ქვეყნის სხვადასხვა ქალაქში აპროტესტებს. კვირას, 8 ნოემბერს რუსთაველზე აქციაც დაიგეგმა. პარტიებში აცხადებენ, რომ გაჩერებას არ აპირებენ.