სტრატეგია აღმაშენებლის ლიდერის, გიორგი ვაშაძის თქმით, ამჟამინდელი სიტუაცია რთულია, თუმცა არა გამოუვალი. გამოსავალი კი ოპოზიციური ერთობა და ხალხის მხარდაჭერაა. ამის შესახებ ვაშაძემ მთავარი არხის ეთერში ისაუბრა.

"სიტუაცია არის რთული, თუმცა არა გამოუვალი. ჩემი აზრით, მთავარი გამოსავალი ამ სიტუაციიდან არის ოპოზიციური ერთობა და ხალხის ძალიან დიდი მხარდაჭერა. მათშიც კი, ვინც ქართულ ოცნებას მისცა ხმა, თანხმობაა, რომ ეს შედეგი, რაც დღეს ქართულ ოცნებას აქვს, არასწორი, უსამართლო და არალეგიტიმურია", — განაცხადა ვაშაძემ.

საპარლამენტო არჩევნები საქართველოში 31 ოქტომბერს ჩატარდა. პარლამენტის არჩევნები წელს პირველად პროპორციულთან მიახლოებული, 120/30-ზე სისტემით გაიმართა. ცესკოს გამოცხადებულ შედეგებს ოპოზიცია არ აღიარებს და პერმანენტულად აქციებს გეგმავს. პარტიების ნაწილი ამბობს, რომ სადეპუტატო მანდატებზე უარს იტყვიან, რათა რიგგარეშე არჩევნები ჩატარდეს.

ახალი საარჩევნო სისტემით, პარლამენტში პროპორციული სიისთვის 120 მანდატია გათვალისწინებული. ცესკოს ახლანდელი მონაცემებით, ეს მანდატები პარტიების მოპოვებული ხმების მიხედვით ასე უნდა გადანაწილებულიყო:

  • ქართული ოცნება — 48,15% — 61 მანდატი;
  • ნაციონალური მოძრაობა და ძალა ერთობაშია — 27,14% — 35 მანდატი;
  • ევროპული საქართველო — 3,78% — 5 მანდატი;
  • ლელო — 3,15% — 4 მანდატი;
  • სტრატეგია აღმაშენებელი — 3,15% — 4 მანდატი;
  • პატრიოტთა ალიანსი — 3,15% — 4 მანდატი;
  • გირჩი — 2, 89% — 4 მანდატი;
  • მოქალაქეები — 1,33% — 2 მანდატი;
  • ლეიბორისტული პარტია — 1% — 1 მანდატი.