საერთაშორისო გამჭვირვალობა — საქართველოში მიაჩნიათ, რომ პრობლემურ უბნებზე ბიულეტენების გადათვლა შედეგებისადმი უნდობლობასა და პოლიტიკურ დაძაბულობას შეამცირებს.

როგორც ორგანიზაციაში ამბობენ, საარჩევნო უბნებიდან მიწოდებული შემაჯამებელი ოქმების ასლების გადამოწმების შედეგად, გამოვლინდა, რომ ოქმების მთლიანი რაოდენობის დაახლოებით 7%-ში აღინიშნება ე.წ. მეტობითი დისბალანსი, ანუ საარჩევნო სუბიექტების მიერ მიღებული ხმების რაოდენობისა და ბათილი ბიულეტენების რაოდენობის ჯამი აღემატება ამომრჩეველთა ხელმოწერების რაოდენობას. მათივე თქმით, პროცედურის სწორად ჩატარების შემთხვევაში ასეთ დისბალანსს ადგილი არ უნდა ჰქონდეს.

მსგავს პოზიციაზეა ISFED. კერძოდ, მათი განცხადებით, შემაჯამებელ ოქმებში დისბალანსის ასეთი მასშტაბურობა ბოლო წლების განმავლობაში არ გამოვლენილა — საარჩევნო უბნების 8%-ზე დაფიქსირდა, რომ დათვლილი ბიულეტენების რაოდენობა აღემატებოდა სიებში ამომრჩეველთა ხელმოწერების რაოდენობას, რაც დარღვევას წარმოადგენს.

ამ მომენტისთვის დათვლილია 3 735 უბნის ოქმები, რაც 3 847 საარჩევნო უბნის 97,09%-ია. წინასწარი მონაცემები ასეთია:

  • ქართული ოცნება — 48,05%;
  • ერთიანი ნაციონალური მოძრაობა — ძალა ერთობაშია — 27,07%;
  • ევროპული საქართველო — 3,79%;
  • პატრიოტთა ალიანსი — 3,18%;
  • ლელო — 3,17%;
  • სტრატეგია აღმაშენებელი — 3,15%;
  • გირჩი — 2,92%;
  • ალეკო ელისაშვილი - მოქალაქეები — 1,34%;
  • ლეიბორისტული პარტია — 1%.

დღეს, 16:00 საათზე ოპოზიცია აქციას მართავს. ასე ეხმაურებიან ისინი არჩევნების შედეგებს. მხარდამჭერებს პარლამენტის წინ შეკრებისკენ მოუწოდა ელენე ხოშტარიამაც.