პლატფორმა ახალი შესაძლებლობებისთვის თანადამფუძნებელი, ესმა გუმბერიძე On.ge-სთან აცხადებს, რომ ისნის ერთ-ერთ ოლქში უსინათლოთათვის მხოლოდ პროპორციული სიის ბიულეტენი იყო ადაპტირებული და მაჟორიტარული კანდიდატისთვის ხმის მისაცემად დახმარება დასჭირდა. ცესკოში აცხადებენ, რომ ორივე ბიულეტენი ადაპტირებული იყო და კონკრეტულად იმ უბანზე რა მოხდა, გაარკვევენ.

"ისნის მე-12 უბანზე როდესაც მივედით მე და კიდევ ერთი უსინათლო დღეს, სადაც ვაძლევ ხოლმე ხმას, დაგვხვდა მხოლოდ ერთი ჩარჩო, რომელიც არის განკუთვნილი პროპორციიული არჩევნებისთვის. ეს ვერ ერგებოდა მაჟორიტარების ბიულეტენს იმიტომ, რომ დაშორებები კანდიდატთა სახელებს შორის არ ემთხვეოდა პროპორციული სიისას, ამიტომ ვერ გამოიყენებდი. შედეგი იყო ის, რომ უბრალოდ ვიღაც უნდა შემოგვყოლოდა, ჩემს შემთხვევაში მშობელი, რომ მაჟორიტარიც შემომეხაზა ჩვენ გვქონდა ცესკოსგან წერილობითი ინფორმაცია, რომ უნდა ყოფილიყო თითო უბანზე 2 ჩარჩო. ჩვენ უბანზე იყო ერთი. როცა მოვიკითხე, სხვა უბნებზე ჰქონდათ 2-2 ჩარჩო", — განაცხადა ესმა გუმბერიძემ.

On.ge ინფორმაციის გასარკვევად ცესკოს დაუკავშირდა. აქ აცხადებენ, რომ ადაპტირებული ფორმები ყველა უბანზე იყო და კონკრეტულ უბანზე რა მოხდა, გაარკვევენ.

"ზოგადად, ორივე იყო ადაპტირებული. ჩარჩო-ფორმა იყო გაკეთებული. შეიძლება ითქვას, რომ ეს ჩარჩო-ფორმა შემუშავდა მხარეებთან და სწორედ იმ პირებთან კონსულტაციით, რომლებიც მაგ საკითხებზე მუშაობენ. ჩარჩო ფორმას გაეცნენ და მოწონებული იყო უსინათლოთა კავშირის მხრიდან. თავდაპირველად, არსებობდა პრობლემა რაოდენობიდან გამომდინარე, რადგან რეგისტრირებული კანდიდატები, საარჩევნო სუბიექტების რაოდენობა ბევრი იყო და ჩარჩო-ფორმა გათვლილი იყო უფრო ნაკლებ კანდიდატზე. მოხდა ამ ჩარჩო-ფორმის ადაპტირება და შეცვლა იმისთვის, რომ მათ შეძლებოდათ არჩევნებში მიეღო დამოუკიდებლად მონაწილეობა. კონკრეტულად იმ უბანზე რა მოხდა, ვერ გეტყვით", — გითხრეს ცესკოში.

2020 წლის საპარლამენტო არჩევნების შესახებ

დღეს 31 ოქტომბერს, საქართველოს პარლამენტის არჩევნები იმართება. წელს პირველად, საარჩევნო სისტემა ყველაზე მეტად მიუახლოვდა სრულად პროპორციულს და არჩევნების 120/30 მანდატების თანაფარდობით ტარდება. აღნიშნული 8 მარტს ოპოზიციისა და მმართველ გუნდს შორის აშშ-ს ელჩის რეზიდენციაში გამართულ არაფორმალურ შეხვედრაზე გადაწყდა. იქვე, სამთავრობო გუნდი და ოპოზიცია, ასევე, შეთანხმდა, რომ პარტია, რომელიც 40%-იან მხარდაჭერას ვერ მოიპოვებს, მთავრობის დაკომპლექტებას ვერ შეძლებს. რაც შეეხება ბარიერს, იგი — 1%-ია.

მთელი ქვეყნის მასშტაბით საარჩევნო უბნები 8 საათზე გაიხსნა და ხმის მიცემის პროცესი დაიწყო. უბნები დღეს 20:00 საათზე დაიხურება.

ისტორიაში პირველად, არჩევნები პროპორციულთან მიახლოებული, 120/30-ზე სისტემით გაიმართება.

გაიგეთ მეტი არჩევნებზე: