აშშ-ის საელჩო იმედგაცრუებას გამოთქვას, რომ მოსამართლეების კონფერენცია დღეს, მნიშვნელოვანი ეროვნული არჩევნების ჩრდილქვეშ გაიმართა. მათი განცხადებით, ეს სასამართლო ხელისუფლების მიერ მიღებული ნაჩქარევი გადაწყვეტილება იყო.

საელჩოს განცხადებაში ნათქვამია, რომ გრძელვადიანი შედეგების მქონე გადაწყვეტილებების მიღება, ისეთი როგორიცაა იუსტიციის უმაღლესი საბჭოს ვაკანტური პოზიციების შევსება, უნდა ხდებოდეს გააზრებულად, გამჭვირვალედ და საკმარისი დროის დათმობით. ასევე, კონსულტაციებისა და კვალიფიციური კანდიდატების ფართო სპექტრის ჩართულობით.

"ამ პროცესის დაჩქარება შეიცავს რისკს, შეირყეს საზოგადოების ნდობა მოსამართლეთა დანიშვნის პროცესის, კანდიდატებისა და მოსამართლეების კონფერენციის მიმართ", — ვკითხულობთ განცხადებაში.

მათი თქმით, აუცილებელია, რომ სასამართლო ხელისუფლებამ ყველა ძირითად თანამდებობაზე შეარჩიოს გამოცდილი, პროფესიონალი და დამოუკიდებელი კანდიდატები. ასევე, მომავალში შერჩევის პროცესის უფრო მეტი გააზრებითა და შორსმჭვრეტელობით წარმართვა უზრუნველყოს.

დღეს მოსამართლეთა კონფერენცია იმართება. იუსტიციის უმაღლესი საბჭოს მდივანმა, გიორგი მიქაუტაძემ თანამდებობა 22 ოქტომბერს დატოვა. იგი იმ დღეს პლენუმმა უზენაესი სასამართლოს სამოქალაქო საქმეთა პალატის თავმჯდომარედ აირჩია. არსებული კანონმდებლობით, ეს საბჭოს მდივნის თანამდებობასთან შეუთავსებელია და მიქაუტაძეს პოსტის დატოვება სწორედ ამიტომ მოუწია. საბჭომ დააანონსა, რომ ახალ წევრებსა და მდივანს 30 ოქტომბერს მოსამართლეთა 28-ე რიგგარეშე კონფერენციაზე აირჩევენ.