24 ოქტომბერს ცნობილ ამერიკულ სატელევიზიო გადაცემაში Saturday Night Live მომღერალი ადელი გამოჩნდა. ეს განსაკუთრებით მნიშვნელოვანი მოვლენაა იმის გათვალისწინებით, რომ ადელმა ბოლო ალბომი 2015 წელს გამოუშვა, გასულ წლებში კი იშვიათად აქტიურობდა და თითქმის საერთოდ გაქრა მხედველობიდან.

პირველ რიგში, უნდა აღინიშნოს, რომ ეს პირველი შემთხვევა არ არის, როცა ეს ბრიტანელი მომღერალი ამ შოუში ვიხილეთ: მაგალითად, 2015 წელს მან თავისი ალბომიდან 25 ახალი სინგლი ცოცხლად შეასრულა.

თუმცა ამჯერად ის გადაცემის მასპინძელი იყო და მთელი ყურადღებაც სწორედ მისკენ იყო მიმართული. მართალია, ბევრი გულშემატკივარი ელოდა, რომ ის ამ შოუს ფარგლებში თავის ახალ სიმღერებს გაგვიზიარებდა, თუმცა ადელმა მუსიკალურ ნომრები თითქმის არ შესთავაზა მაყურებელს, სანაცვლოდ კი კომიკური სამსახიობო შესრულებით გაართო ყველა.

გადაცემის გახსნისას ტრადიციულ მონოლოგში ადელი ისე შთამბეჭდავად წარსდგა კამერის წინ, რომ ყველას გული მაშინვე მოიგო.

თუ აქამდე არ იცოდით, ალბათ, ახლა მაინც შენიშნავდით, რომ მომღერალმა წონაში დაიკლო, რაც, ცხადია, არც თავად დაუტოვებია აღნიშვნის გარეშე:

"პანდემიის გამო არსებულმა შეზღუდვებმა და მოგზაურობების აკრძალვამ მაიძულა, მსუბუქად მემგზავრა და მხოლოდ ჩემი ერთი ნახევარი წამოვიღე თან", — იხუმრა ადელმა.

მან ასევე კარგად იცის, რომ ყველა მის ახალ ალბომს ელოდება, რასთან დაკავშირებითაც, მართალია, არც ისე დამაიმედებელი, მაგრამ ახალი ინფორმაცია მაინც გაგვიზიარა:

"ალბომზე მუშაობა არ დამისრულებია. ამის გაკეთება ისევე მაშინებს, როგორც ამ გადაცემის წაყვანა. მირჩევნია, პარიკი დავიხურო, ხუთი ჭიქა ღვინო დავლიო, ან თუნდაც ექვსი, და დაველოდო, რა მოხდება" — აღნიშნა ადელმა.

მისი სრული მონოლოგის მოსმენა ამ ვიდეოში შეგიძლიათ:

მომღერალი რამდენიმე კომიკურ სკეტჩში გამოჩნდა და მათგან ყველაზე დასამახსოვრებელი აფრიკული ტურიზმის შესახებ მისი, კეიტ მაკკინონისა და ჰაიდი გარდნერის ვითომ სარეკლამო რგოლი იყო, რომლის დროსაც მომღერალმა სიცილი ვერ შეიკავა.

ეს თქვენი თვალით უნდა ნახოთ:

თამამად შეგვიძლია ვთქვათ, რომ ამ ყველაფრით ის ყველაზე მეტად გაერთო.

და თვალს წყალიც დაალევინა.

ტურიზმის სააგენტოს ჭკუამხიარულ აგენტთან ერთად ადელი მოჩვენების როლშიც მოგვევლინა და უნდა ვაღიაროთ, რომ ის ერთ-ერთი ყველაზე მომხიბვლელი მოჩვენებაა, რომელსაც შეიძლება სადმე გადავეყაროთ.

მართალია, გადაცემაში ადელი ძირითადად კომიკურ შესრულებებს გვთავაზობდა, თუმცა მათ, ვისაც მისი ნამღერის მოსმენა მოენატრა, მომღერალმა ბოლომდე არ დასწყვიტა გული და ერთ-ერთ სკეტჩში თავისი ისეთი ცნობილი ჰიტები წაიმღერა, როგორებიცაა Hello, Set Fire to the Rain და Someone Like You.

მაყურებლების დიდი ნაწილი უკვე შეთანხმდა, რომ Saturday Night Live-ის ისტორიაში ეს ერთ-ერთი ყველაზე სახალისო და დასამახსოვრებელი ეპიზოდი იყო, რაც სწორედ ადელის საოცარი ქარიზმატულობის დამსახურებაა.

და თუ ამ აზრს არ ეთანხმებით, იცოდეთ, სადღაც კუთხეში შეიძლება ადელი ეჭვის თვალით გიყურებდეთ.