ევროპული საქართველოს ქობულეთის მაჟორიტარი დეპუტატობის კანდიდატი ირინა აფხაზავა ჩაქვში, ჩაისუბანში, ადგილობრივებს შეხვდა და მათი პრობლემები მოისმინა.

პარტიაში ამბობენ, რომ ადგილობრივებისგან მოისმინეს პრობლემები ეროზიული პროცესებისა და მეწყრის საშიშროების შესახებ. აფხაზავას თქმით, მიუხედავად იმისა, რომ მოსახლეობას აქვს გეოლოგიური დასკვნა, ადგილობრივ ხელისუფლებას უყურადღებოდ ჰყავს მიტოვებული ადამიანები. დეპუტატობის კანდიდატმა აღნიშნა, რომ გარდა ამისა, არსებობს სამელიორაციო, სანიაღვრე პრობლემები და ახლოს მდებარე ნაგავსაყრელი, რომელიც საფრთხეს უქმნის ადგილობრივების ჯანმრთელობას.

"კარდაკარის მსვლელობის დროს მოვხვდი ჩაქვის ჩაის უბანში, ჩიბურდანიძეების დასახლებაში, სადაც დამხვდა შემაძრწუნებელი სიტუაცია. მოსახლეობა სტიქიას ებრძვის წვიმის დროს. 40 ოჯახი არის მეწყერსაშიშ ზონაში, სადაც ვაკე ადგილებიც კი ჩარეცხილია. მოსახლეობის თხოვნა იყო, რომ ეს ყველაფერი გაგვეშუქებინა. ამ პრობლემასთან ერთად არის ისიც, რომ აქ არის ნაგავსაყრელი, რითაც მოსახლეობა იწამლება. არის, ასევე, გზის პრობლემა და სანიაღვრე პრობლემები. არ არის ჩატარებული სამელიორაციო საქმიანობა.

ადგილობრივი ხელისუფლების ერთადერთი პასუხი არის, რომ ეს ხალხი თავისი სახსრებით გადავიდეს იქ, სადაც თვითონ იგრძნობს თავს უსაფრთხოდ. ამ ადამიანებს ემუქრებათ რეალური საფრთხე, ხელისუფლების უყურადღეობას და ამ მძიმე მდგომარეობიდან ამოსვლას კი სჭირდება გარდამტეხი ცვლილებები, რათა ქვეყანა წავიდეს წინ", — განაცხადა ირინა აფხაზავამ.