არასამთავრობო ორგანიზაციების ნაწილი მოუწოდებს შსს-სა და სტატისტიკის სამსახურს - განმარტონ რას უკავშირდება ის, რომ გასული წლების განმავლობაში, პოლიციის ყოველთვიური სტატისტიკა გამოქვეყნებული არ არის.

ასევე, მოუწოდებს რომ 2010 წლის უწყებათაშორისი მემორანდუმით გათვალისწინებული ვალდებულება შეასრულოს. დოკუმენტის თანახმად, შსს-მ სტატისტიკის ეროვნულ სამსახურს, სისხლის სამართლის სტატისტიკის ერთიანი ანგარიშის მიზნებისათვის, ყოველთვიურად უნდა მიაწოდოს მემორანდუმით განსაზღვრული ინფორმაცია.

ორგანიზაციები მიმართავენ სამინისტროს, რომ საზოგადოების ინფორმირების და გამჭვირვალობის მიზნით განაგრძოს საკუთარ ვებ-გვერდზე სტატისტიკური ინფორმაციის გამოქვეყნება.

ხელმომწერი ორგანიზაციები მიიჩნევენ, რომ დემოკრატიული პოლიციის ისეთი ძირითადი პრინციპები, როგორიცაა გამჭვირვალობა და ანგარიშვალდებულება მოითხოვს, რომ პოლიცია იყოს ღია მის ქმედებებზე ზედამხედველობის განხორციელებისათვის.

NGO-ების განმარტებით, საჯარო საინფორმაციო ანგარიშები არის გამჭვირვალობისა და საზოგადოებასთან კომუნიკაციის მიღწევის ერთ-ერთი საშუალება.

2010 წლის 30 აპრილს, ხუთ უწყებას შორის დადებული თანამშრომლობის მემორანდუმის თანახმად, ერთიანი სტატისტიკური ანგარიშის მიზნებისათვის, შსს ყოველთვიურად უნდა წარუდგენდეს საქსტატს საანგარიშო პერიოდში რეგისტრირებული დანაშაულის სტატისტიკას. მათ შორის, დაწყებული გამოძიების შეწყვეტისა და კვალიფიკაციის შეცვლის შესახებ დანაშაულების მიხედვით, ინფორმაციას დაზარალებული პირების, ადმინისტრაციული სამართალდარღვევებისა და ოჯახში ძალადობის ფაქტების შესახებ.

არასამთავრობოების განცხადებით, საქსტატის მიერ 2010 წლის მემორანდუმის საფუძველზე, 2012-2016 წლების გამოქვეყნებული სისხლის სამართლის სტატისტიკის ერთიანი ანგარიში არც ერთ თვეში არ მოიცავს შინაგან საქმეთა სამინისტროს მიერ მიწოდებულ ინფორმაციას და ანგარიშები იწყება პირველი თავის, პოლიციის სტატისტიკის, გამოტოვებით.

ორგანიზაციები მიუთითებენ იმასაც, რომ 2016 წლის 15 თებერვლის შემდგომ, შინაგან საქმეთა სამინისტროს საკუთარ ვებ-გვერდზე დანაშაულის სტატისტიკა არ გამოუქვეყნებია.

ხელმომწერი ორგანიზაციები:

  • ადამიანის უფლებების სწავლებისა და მონიტორინგის ცენტრი (EMC)
  • საერთაშორისო გამჭვირვალობა - საქართველო (TI)
  • ინფორმაციის თავისუფლების განვითარების ინსტიტუტი (IDFI)