საქართველოს პარლამენტის თავმჯდომარის, არჩილ თალაკვაძის განცხადებით, ხელისუფლება მზადააა, საერთაშორისო დამკვირვებლების ჩამოსაყვანად ჩარტერული რეისები დანიშნონ.

"ჩვენ გვაქვს სრული მზადყოფნა, საერთაშორისო დამკვირვებლების ჩამოსაყვანად ქვეყანაში, ჩვენ ამისთვის უზრუნველყოფილი გვაქვს უსაფრთხოების სპეციალური პროგრამა და პირობები და ასევე, საკოორდინაციო საბჭო პრემიერ გიორგი გახარიას ხელმძღვანელობით. ჩვენ მზად ვართ ჩარტერული რეისების დასანიშნადაც კი, რომ ჩამოვიყვანოთ ქვეყანაში რაც შეიძლება მეტი საერთაშორისო დამკვირვებელი", — განაცხადა თალაკვაძემ.

მისივე თქმით, როგორც კი საერთაშორისო სადამკვირვებლო ორგანიზაციები მიიღებენ გადაწყვეტილებას და გააკეთებენ განაცხადებს, მაშინვე ხელისუფლება სათანადო ნაბიჯებით უპასუხებს.

არჩევნებში საერთაშორისო დამკვირვებლების ჩართულობაზე ოპოზიციამ არაერთი განცხადება გააკეთა. მათ მიერ გავრცელებული ინფორმაციით, ხელისუფლება ცდილობდა, დამკვირვებლების ჩამოყვანისთვის ხელი შეეშალა.