თამარ ბაჩალიაშვილის დედის, თეონა თამაზაშვილის განცხადებით, პროკურორმა, რომელსაც ის ბულინგში ადანაშაულებდა, ბოდიში მოიხადა. მისი თქმით, მარიამ გოგორელიანი საქმეს ჩამოაშორეს. თამაზაშვილმა ამის შესახებ გენერალურ პროკურორთან შეხვედრის დასრულების შემდეგ ისაუბრა.

ბაჩალიაშვილების ოჯახის ადვოკატის, მიხეილ რამიშვილის განცხადებით, პროკურორი ოჯახის მიმართ არაეთიკურად მოქმედებდა.

"მივიღეთ ინფორმაცია, რომ ის პროკურორი, რომელიც არაეთიკურად ახოცრიელებდა მოქმედებას, ჩამოშორდა საქმეს. მისი ქცევა დაზარალებულის მიმართ არ იყო ეთიკური", — განაცხადა მიხეილ რამიშვილმა.

ბაჩალიაშვილის დედამ TV პირველთან განაცხადა, რომ საქმის პროკურორი მას არარელევანტურ კითხვებს უსვამდა და აბულინგებდა. ამ განცხადების საფუძველზე პროკურატურის გენერალურ ინსპექციაში შესაძლო დისციპლინური გადაცდომის ჩადენის ფაქტეზე სამსახურებრივი შემოწმება დაიწყო.

23 წლის პროგრამისტი, თამარ ბაჩალიაშვილი 18 ივლისს დაიკარგა. ოჯახის წევრების განცხადებით, ის საკუთარი მანქანით ქვემო ფონიჭალიდან გავიდა და აღარ დაბრუნებულა. დაკარგვიდან 5 დღის შემდეგ, ბაჩალიაშვილი საკუთარ მანქანაში გარდაცვლილი იპოვეს. მანქანა თეთრიწყაროს მუნიციპალიტეტში, მაგისტრალიდან 100-200-მდე მეტრის დაშორებით, ბუჩქნარში იყო გაჩერებული. ოჯახის ადვოკატის, მიხეილ რამიშვილის თქმით, ცხედარი უკანა სავარძელზე იყო და ქალი რამდენიმე დღის გარდაცვლილია.

საქმეზე გამოძიება თავისუფლების უკანონო აღკვეთის მუხლით მიმდინარეობდა. 24 ივლისს საქმეს კიდევ ერთი კვალიფიკაცია თვითმკვლელობამდე მიყვანის მუხლი დაემატა.

ჯერ კიდევ ძებნის პროცესში გამოძიებამ ამოიღო ბაჩალიაშვილის კომპიუტერი, თუმცა ოჯახი აცხადებდა, რომ მისი გახსნა ვერ შეძლეს. მოგვიანებით კი მამამ მედიასთან თქვა, რომ პოლიციელის თქმით, მისი შვილი "დიდ შარში იყო". ოჯახის ადვოკატი კომპიუტერის გახსნის პროცესზე დასწრებას ითხოვდა, თუმცა, მიხეილ რამიშვილის განცხადებით, ლუქი მის გარეშე მოხსნეს.

შინაგან საქმეთა სამინისტროს მტკიცებით, თამარ ბაჩალიაშვილი გარდაცვალებამდე თვითმკვლელობის მეთოდებს Google-ში ეძებდა. ამასთან, უწყების ინფორმაციით, 23 წლის გოგომ Facebook-ზე მოძებნა ინფორმაცია, რა მოსდის მის ანგარიშს გარდაცვალების შემდეგ.